• Era nauetat d’aguesta edicion ei qu’era interpretacion d’aguesti 3 concèrts se harà en glèises romaniques, e s’eth temps ac permet, en exterior

Ena agenda culturau d’aguest ostiu non podien mancar es actuacions deth dejà consolidat Romanic Musicau, qu’enguan celèbre era sua 22au edicion. Eth Departament de Torisme deth Conselh Generau d’Aran a creat un programa de 3 concèrts gratuïts es diuendres d’aguest mes d’agost, enes que se combinaràn diuèrsi estils musicaus: musica classica experimentau, jazz e pòp. Enguan poiram compdar damb ua grana varietat d’instruments e formats tà apropar ath public, en un hons d’estetica romanica, ua musica qu’ei tostemp d’actualitat.

S’era meteorologia ac permet, es concèrts auràn lòc en exterior des tres glèises, tara major seguretat deth public per motius de prevencion dera COVID-19. Tanben s’a auançat er orari des concèrts tàs 19.30 ores.

Eth prumèr espectacle serà aguest diuendres, 13 d’agost, ena glèisa de Sant Blai de Les, a on era joena lheidatana Berta Puigdemasa acompanharà as presents damb era sua arpa en tot apropar es sons des auditòris tath nòste territòri.

Eth jazz serà eth protagonista dera dusau actuacion, qu’aurà lòc eth diuendres 20 d’agost ena glèisa de Sant Andrèu de Salardú. Aguest grop de 3 artistes hè de cada pèça musicau ua òbra unica que conquiste as espectadors en un dirècte damb era onestedat totau de çò que passe en scenari.

Barrarà aguest cicle eth quartet de pòp Piano, ena glèisa de Sant Fèlix de Vilac, eth darrèr diuendres d’agost, dia 27. Aguest grop de cramba prepause un programa plen de compositors pòp deth panorama actuau en tot portar era musica pòp ath format classic de concèrt tà hèr a arribar era musica de cramba a toti es publics.

Vielha, 11 d’agost de 2021