Comence era senhalizacion deth Camin de Sant Jaime ath sòn pas per Aran

  • S’installaràn diferents elements de senhalizacion e seguiment ath long deth camin

  • Era totalitat deth traçat aranés d’aguest camin transcor per camins dejà senhalizadi peth Conselh Generau

Era recuperacion deth Camin de Sant Jaime Aran-Pirenèus continue auançant e dejà s’a iniciat era fasa de senhalizacion.

Entà garantir era comoditat, prudéncia e, sustot, era seguretat des futurs peregrins que trauessaràn era Val d’Aran, s’estan installant 12 banderòles naues, vitòles e pegasolets ena senhalizacion dejà existent, atau coma balises de seguiment ath long deth camin.

Ath delà, tanben se plaçarà un pannèu de 35x50cm en Pontaut e dus pannèus grani de 100x150cm en Vielha e Conangles.

Aguest projècte recupère eth camin de Sant Jaime entre Saint Bertrand de Comminges e Berbegal (Somontano) ath sòn pas pera Val d’Aran. Era totalitat deth traçat aranés d’aguest camin transcor per camins senhalizadi peth Conselh Generau d’Aran.

Era senhalizacion deth camin Sant Jaime Aran-Pirenèu ei includida en marc deth Programa de Desvolopament Rurau de Catalonha 2014-2020. Enguan s’establic un convèni de collaboracion entre eth Conselh Generau e eth Conselh Comarcau dera Nauta Ribagorça, peth quau cada institucion invertís 17.085 euròs entara senhalizacion.

Comments are closed.