• Era collaboracion s’establís en marc dera formacion de tecnics esportius, reciclatges professionaus e formacion contunhada damb era mobilitat deth professorat entre es dues institucions, era coordinacion e especializacion des diferenti plans d’estudis, çò que supausarà ua major qualitat entàs alumnes que corsen es sòns estudis tant ena ETEVA coma en INEFC.

Era Escòla de Tecnics Esportius dera Val d’Aran (ETEVA) e er INEFC an signat un convèni de cooperacion educativa que supause era formalizacion dera collaboracion que des de hè ans s’amie a tèrme entre ambdues institucions.

Tant eth vicesindic d’Aran e conselhèr d’Espòrts, Luis Carlos Medina, coma eth director der INEFC, Jordi Solà, manifestèren era sua satisfaccion pendent er acte de signatura que se realizèc enes installacions dera Escòla en Salardú (Val d’Aran). Posterioraments se realizèc ua visita as diferenti grops d’alumnes dera ETEVA e der INEFC que pendent aguesti dies realizen era formacion practica ena estacion d’esquí aranesa, Baqueira Beret.

En paraules deth vicesindic d’Aran e conselhèr d’Espòrts, Luis Carlos Medina: “Eth convèni a coma objècte establir linhes de collaboracion en marc dera formacion, er escambi de coneishements scientifics e tecnics e er aprofitament de recorsi personaus e materiaus en airau des espòrts d’iuèrn, de montanha e d’escalada”.

Era collaboracion s’establís en marc dera formacion de tecnics esportius, reciclatges professionaus e formacion contunhada damb era mobilitat deth professorat entre es dues institucions, era coordinacion e especializacion des diferenti plans d’estudis, çò que supausarà ua major qualitat entàs alumnes que corsen es sòns estudis tant ena ETEVA coma en INEFC.

Tanben se preten auançar en airau dera recèrca, en tot facilitar recorsi e logistica as possibles prepauses que des der INEFC vagen restacades damb es espòrts d’iuèrn e era montanha.

Vielha, 11 de gèr de 2017

Conselh Generau d’Aran: Núria Sanjuan

Hònt: ETEVA