Vielha, 6 d’abriu de 2017.- Damb era nhèu maximala en tot superar es 2 mètres, era dimenjada deth 8 e 9 d’abriu se dispute ena Val d’Aran era Copa deth Mon d’Esquí de Montanha dera Internationau Ski Mountaineering Federation ( ISMF).

Aguesta pròva serà era darrèra des cinc puntuables entara Copa deth Mon d’Esquí de Montanha dera ISMF e decidirà era classificacion finau dera competicion.

Eth dissabte 8 d’abriu se disputarà era pròva individuau, en marc dera 59au edicion deth Ralli deth CEC, e eth dimenge 9 d’abriu era pròva verticau, eth çò qu’ei era tradicionau Era Pujada. Parallelament se celebraràn es pròves Open e es puntuables entara Copa Catalana d’Esquí de Montanha dera Federació d’Entitats Excursionistes de Catalunya (FEEC).

Es mielhors esquiadors e esquiadores de montanha deth mon se trobaràn ena Val d’Aran: es italians Michele Boscacci, Roberto Antonioli, er alemand Anton Pälzer, eth francés William Bon Mardion, o es catalans Oriol Cardona e Marc Pinsach, ena categoria masculina. Cau destacar era abséncia de Kilian Jornet, guanhador actuau dera Copa deth Mon, que se tròbe en tot premanir er assaut ara pujada der Everest.

Ena categoria femenina ath delà des catalanes Claudia Galicia, Marta Garcia, Laura Orgué e Mireia Miró, destaquen era actuau numèro 1 deth mon, era francesa Laetitia Roux, era tanben francesa Axelle Mollaret e era italiana Katia Tomatis.

Era corsa compde damb eth supòrt deth Conselh Generau d’Aran, es ajuntaments de Vielha e Mijaran e de Naut Aran, e dera EMD de Bagergue. Era competicion, organizada peth Centre Excursionista de Catalunya (CEC) e peth Centre Excursionista d’Aran, en collaboracion damb Baqueira Beret, se disputarà en entorn dera estacion. Era pròva, ath delà, compde damb eth supòrt dera Federacion Espanhòla d’Espòrts de Montanha e Escalada (FEDME) e dera Federació d’Entitats Excursionistes de Catalunya (FEEC)

Mès informacion en www.valdaranskimoworldcup.cat