• Ua quinzea d’establiments aranesi expausaràn es sòns productes ena hèira

• Tanben se realizaràn diferenti talhèrs a cargue de diuèrsi artesans aranesi

Eth Conselh Generau d’Aran organize ua naua edicion dera hèira Aran Market, qu’aurà lòc en Vielha deth 17 ath 20 d’agost. Era hèira preten promòir es diferenti productes des comerçants dera Val d’Aran.

Ua quinzea d’establiments treiràn en carrèr es sòns productes entà hèr conéisher era vasta varietat qu’aufrís eth comèrç aranés. En aguest sens, i aurà comerçants de ròba, alimentacion, souvenirs, complements, decoracion, atau coma era preséncia de diuèrsi mestieraus.

“Aran Market ei un eveniment que pòrte ja diuèrsi ans en marcha, e que cada an artenh atrèir era atencion de fòrça visitants. Atau, se poténcie eth comèrç aranés, damb era preséncia de visitants ath long des diferentes jornades que dure era hèira”, comente era conselhèra de Torisme e Desvolopament Economic d’Aran, Anna Díaz.

Pendent es tres dies dera hèira i auràn estands a on se veneràn es productes. Ath delà, tanben se realizaràn diferenti talhèrs d’artesania e de textil amiadi a tèrme per artesans aranesi.

Er orari d’Aran Market serà d’11h00 a 21h00 ininterrompudament.

TALHÈRS D’ARAN MARKET

Dimars 18 d’agost:

• De 17h30 a 19h00:

Talhèr de modelatge damb hanga polimerica a cargue de Núria Ninyerola
Hèm un tampon!, a cargue d’Alicia Mitjans

Dimèrcles 19 d’agost:

• De 17h30 a 19h00:

Talhèr de bombes e saus de banh a cargue de Sabons Careça
Talhèr de clauèrs e braçalets de macramè, a cargue de Baobab artesania

Dijaus 20 d’agost

• De 17h30 a 19h00:

Maquilhatge infantil a cargue de Kristina Nart