Deth 8 ath 15 d’abriu 7au edicion deth Hestivau Culturau Pyrenades ena Val d’Aran

Vielha, 7 d’abriu de 2017.- Deman dissabte 8 d’abriu, arrinque era 7au edicion deth Hestivau Culturau de Setmana Santa ena Val d’Aran, Pyrenades 2017, que s’alongarà enquiath pròplèu dia 15 d’abriu, plen d’activitats gratuïtes entà toti es publics.

00012
Eth Hestivau Pyrenades 2017 prepause conferéncies e dialògs, caminades, cinèma de montanha, musica e activitats infantiles. Era sedença centrau deth hestivau ei eth PyrenMuseu de Salardú.

Pendent tota era setmana se succediràn es activitats entre es que destaquen charrades sus er espòrt de montanha e era competicion, passejades per paratges naturaus dera Val d’Aran coma es lacs de Baciver, era ribèra deth Unhola o era balconada der Aneto, ath delà d’un recorregut a pè per Vielha. Era VII Mòstra de cinèma de montanha, damb diuèrses projeccions e jòcs, concerts deth Romanic Musicau e talhèrs entà mainatges e un cors infantil d’iniciacion ena montanha.

Laguens dera aufèrta deth hestivau culturau Pyrenades d’enguan, destaque era exposicion “Impressions dera Val d’Aran” en Sant Joan d’Arties, que se poderà visitar a compdar deth dia 8 d’abriu.

Cesar Ruíz Canela, baile de Naut Aran e Manel Rocher, director de Pyrenades, seràn es encargadi d’inaugurar eth hestivau que finalizarà eth dissabte 15 d’abriu en PyrenMuseu damb era actuacion musicau d’Ian Sala.

A compdar dera sua prumèra edicion en 2011, Pyrenades s’a convertit en ua excellenta opcion entà gaudir dera Setmana Santa ena Val d’Aran, en contacte damb era natura e en tot gaudir d’un ample programa d’activitats gratuïtes entà tota era familha.

Tota era informacion deth programa de Pyrenades 2017: http://www.pyrenades.es/programa.html

Comments are closed.