• Era sindica d’Aran s’a amassat telematicament damb eth secretari de Govèrns locaus e Relacions damb Aran dera Generalitat entà tractar sus es competéncies que, atau coma establís era Lei de Regim Especiau d’Aran, a d’assomir eth Conselh Generau e qu’encara non an estat assomides de forma efectiva e revisar aqueres competéncies traspassades qu’an de besonh ua melhora

• Era sindica a tornat a reclamar qu’eth Departament de Presidécia modifique era assignacion d’Aran entà 2022 damb era incorporacion des mès de 280.000 € restants dera aportacion addicionau de politiques pròpries

Aguest maitin a auut lòc, telematicament, era dusau amassada dera Ponéncia permanent en matèria de traspassi e convènis entre eth Conselh Generau d’Aran e era Generalitat de Catalunya, presidida pera sindica d’Aran, Maria Vergés, e eth secretari de Govèrns locaus e Relacions damb Aran, David Rodríguez.

“Era Ponéncia permanent en matèria de traspassi e convènis ei un òrgan de vitau importància entath desplegament dera Lei de Regim Especiau d’Aran e des competéncies qu’encara non an estat assomides de forma efectiva peth Conselh, que son era majoria des que recuelh era Lei”, afirmaue era sindica d’Aran.

Pendent aguesta amassada, s’an tractat ahèrs coma er increment de 30.000 € pendents de hè temps ena aportacion dera Secretaria Generau d’Espòrts dera Generalitat entà bèques de supòrt as esportistes aranesi o er estat des negociacions damb eth Departament de Cultura entara revision e actualizacion deth traspàs de competéncies, un ahèr fòrça urgent entath govèrn deth Conselh Generau d’Aran, pr’amor qu’aguesta competéncia non s’a actualizat des der an 1992.

Era sindica d’Aran a tornat a reclamar qu’eth Departament de Presidéncia modifique era assignacion deth Conselh Generau d’Aran entà 2022 damb era incorporacion des mès de 280.000 € restants dera aportacion addicionau de politiques pròpries.

Aguest òrgan, constituït ena darrèra Comission Bilaterau deth Conselh Generau d’Aran e era Generalitat de Catalunya, a coma objectiu principau er impuls e era preparacion de prepauses de traspassi que s’agen d’elevar ath Plen dera Comission, atau coma er estudi de prepauses de convènis e e d’auti esturments de collaboracion entre andues institucions qu’afecten ara gestion des servicis non traspassadi.