Eth Conselh Generau d’Aran apròve era declaracion coma BCIL de quauqui elements deth pòble de Bausen

  • En tot atier ara demana presentada per dues associacions culturaus de Bausen, eth Plen deth Conselh Generau d’Aran aprovèc era declaracion coma Ben Culturau d’Interès Locau (BCIL) dera glèisa parroquiau de Sant Pèir e eth sòn cementèri, era capèla de Sant Ròc, eth cementèri civiu de Teresa e era capèla de Santa Anna

Eth Plen deth Conselh Generau d’Aran aprovèc iniciaument eth passat diuendres, 18 de seteme, era declaracion coma Ben Culturau d’Interès Locau (BCIL) de tota ua sèria d’elements deth pòble de Bausen pr’amor des sòns valors istorics, arquitectonics e artistics.

Aguesta aprobacion, que compdèc damb es vòts a favor dera equipa de govèrn e era abstencion deth grop de CdA, afècte ara glèisa parroquiau de Sant Pèir e eth sòn cementèri, era capèla de Sant Ròc, eth cementèri civiu de Teresa e era capèla de Santa Anna.

Era iniciatiua dera declaracion d’aguesti paratges coma BCIL partic iniciaument des associacions  culturaus Es Sarnalhèrs e Lanaranesa de Bausen, que presentèren ua demana ath Conselh Generau d’Aran en data 10 de deseme de 2019. Era demana siguec avalorada ena Comission d’Auviatge, a on, per unanimitat, s’estimèc quini èren es elements qu’amassauen es caracteristiques  entà gaudir dera consideracion de Ben Culturau d’Interès Locau, excludint-ne bèri d’autes, perque ja gaudien dera consideracion, coma es lauaders,  o pr’amor que non auien entitat suficient.

“Aguesta a estat ua demana des vesins de Bausen que considerèrem fòrça interessanta pr’amor que toti aguesti elements, que per eri madeishi an un gran valor patrimoniau, meriten èster protegidi e mos cau evitar que se maumeten”, asseguraue eth sindic d’Aran, Francés Boya, en tot híger que: “damb aguesta catalogacion coma BCIL existís era obligacion per part des administracions de invertir recorsi entara sua preservacion, en tot garantir atau eth suenh ath nòste auviatge e era nòsta cultura, que son un des grans tresaurs dera Val d’Aran”.

Comments are closed.