• Baqueira-Beret acuelhec aguest eveniment en aunor ara defunta esquiadora, en quau sigueren presents es sòns frairs e eth sòn hilh e ath quau assistiren tanben eth sindic d’Aran, eth president dera RFEDI e eth president dera estacion d’esquí aranesa

Era passada dimenjada, es dies 21 e 22 de deseme, Baqueira-Beret acuelhec eth I Trofèu FIS Blanca Fernández Ochoa, en aunor ara defunta esquiadora, fòrça relacionada damb era Val d’Aran e qu’artenhec era tresau posicion enes JJOO d’Albertville en 1992.

Er eveniment siguec organizat pera Reau Federacion Espanhòla d’Espòrts d’Iuèrn (RFEDI) e era estacion d’esquí aranesa, e compdèc damb era collaboracion deth Conselh Generau d’Aran e er Ajuntament de Naut Aran.

Era corsa compdèc damb dus slaloms enes quaus participèren 170 esquiadors e esquiadores des categories absolutes U21 e U18. En aguest eveniment tan especiau i estèren presents es frairs e er hilh de Blanca, e i assistiren tanben eth sindic d’Aran, Francés Boya, eth president de Baqueira-Beret, Aureli Bisbe, e eth president dera RFEDI, May Peus.

Era fraia de Blanca, Lola Fernández Ochoa, afirmaue que “segur qu’aguesta ei era manèra ena qu’a Blanca li auesse agradat estar rebrembada: entre tanta gent joena en actiu en tot entrenar e concórrer a hons entà hèr-se un lòc ena elit der esquí”.

Eth sindic d’Aran manifestèc que “Blanca a estat e ei encara ua figura fòrça important entara Val d’Aran pr’amor que se formèc coma esportista aciu. Tota era familha Fernández Ochoa a agut ua relacion molt dirècta e intensa damb Aran”, e higec que “mos cau èster fòrça arregraïdi damb Blanca per auer estat ua des granes ambaishadores deth nòste territòri ath long deth mon e aguesta competicion ei ua mòstra d’aguest arregraïment”.

Luis Fernández Ochoa expliquèc que “hèr aguest aumenatge ena Val d’Aran a tot eth sentit deth mon, pr’amor que Blanca, Lola e jo passèrem, coma minim, 10 ans esquiant en Baqueira e era Tuca quan era RFEDI auie era sedença esportiua d’alpin en Vielha enes ans 70. Aran sonque mos pòrte boni recòrds”.

A despièch dera dificil meteorologia, es competicions se disputèren gràcies ara professionalitat des tecnics der Stadium de Beret, es professionaus dera RFEDI e es clubs dera Val d’Aran.

Es resultats d’aguesta competicion sigueren:

SL hemnes dissabte

SL òmes dissabte

Slalom hemnes dimenge

Slalom òmes dimenge