En març arribe era 5au edicion deth Mes deth Caviar ena Val d’Aran

  • Pendent es dies 6 e 29 de març, nau restaurants aranesi aufriràn un menú exclusivament dessenhat entà dar protagonisme ath Caviar Nacarii, producte etiquetat damb eth sagèth de Marca Garantia dera Val d’Aran

Caviar Nacarii e eth Conselh Generau d’Aran, damb era collaboracion deth Grèmi d’Ostalaria dera Val d’Aran, organizen, un an mes, ua naua edicion deth Mes deth Caviar ena Val d’Aran.

Pendent aguestes jornades gastronomiques, nau restaurants aranesi aufriràn un menú exclusivament dessenhat entà dar protagonisme ath Caviar Nacarii a trauès d’uns plats que meten en valor aguest exclusiu ingredient.

Casa Irene, Bòrda Lobató, Era Coquèla, Lits Restaurant, Del Gel al Foc, Era Mòla, Es Arraïtzes, Ticolet e Er Occitan son es restaurant a on se poderà gaudir d’aguest menú especiau pendent es dies 6 e 29 de març.

“Eth Caviar Nacarii ei un producte que da fòrça prestigi ara Val d’Aran e que mos diferéncie dera rèsta de territòris de montanha pr’amor qu’ei un producte totaument exclusiu”, afirme eth conselhèr d’Economia, Torisme e Promocion Economica, Juan Antonio Serrano, que hig que: “aguest producte ajude a diversificar era ofèrta dera zòna, en tot ampliar es opcions gastronomiques dera gent que mos visite e que cerque diferentes alternatives”.

Caviar Nacarii ei un des productes que pòrte eth sagèth de Marca Garantia, que, segontes explique eth conselhèr d’Economia, Torisme e Promocion Economica, Josep Canut: “es productes etiquetats damb aguest logotip son productes de qualitat que passen contròls periodics, e que s’elabòren artesanaument en territòri”.

Actuaument, aguest sagèth remasse un totau de 45 productes de 14 productors diferents, entre eri plats tipics e tradicionaus dera gastronomia aranesa coma eth patè, es anditos, era òlha aranesa o es coquilhons, atau coma aliments artesanaus que profiten era qualitat des recorsi naturaus d’Aran coma ei eth cas deth Caviar Nacarii e er esturion, era sidra, era bièra o era mèu, entre molti d’auti.

Comments are closed.