Era Val d’Aran compde damb eth Centre de Tecnificacion Esportiua d’Espòrts d’Iuèrn des der an 2012.

Dempús d’ans de trabalhs intensi per part des institucions, es clubs e es entitats privades, era Val d’Aran a artenhut un bon prestigi que la place ath mès naut nivèu en çò que tanh a centres des madeishes caracteristiques en país.

Eth vicesindic e conselhèr d’Espòrts d’Aran, Luis Carlos Medina, a presentat a totes es Associacions, Federacions e Clubs esportius damb preséncia ena Val d’Aran ath nau director deth Centre de Tecnificacion d’Espòrts d’Iuèrn dera Val d’Aran, Eduardo Puente.

Eth Centre Especializat de Tecnificacion Esportiua d’Espòrts d’Iuèrn dera Val d’Aran dauric es sues pòrtes er an 2012 dempús deth convèni signat peth Conselh Generau d’Aran, eth Conselh Catalan der Espòrt dera Generalitat de Catalonha e era Federacion Catalana d’Espòrts d’Iuèrn, en tot èster titolaritat deth Conselh Generau d’Aran.

Aguesta infrastructura servís entà formar a joeni esportistes e plaçar-les ena elèit des espòrts d’iuèrn a nivèu internacionau.

Eth Centre de Tecnificacion Esportiua d’Espòrts d’Iuèrn (CETEI) dera Val d’Aran, restacat ara Reau Federacion Espanhòla d’Espòrts d’Iuèrn (RFEDI) e ara Federacion Catalana d’Espòrts d’Iuèrn (FCEH), a per objectiu ajudar ara progression de joeni promeses e velhar pera sua formacion integrau. Es esportistes seleccionadi arreceben formacion tecnica/esportiua e academica, ath delà d’un seguiment medicau/psicologic entà garantir un estat de salut apte entara practica esportiua e ua gessuda professionau de futur.

Era formacion academica la realizen en IES d’Aran e ath delà compden damb eth gran supòrt de Baqueira Beret, ua des estacions d’esquí mès prestigioses deth mon, a on es compausants deth CETEI an installat eth sòn camp base.

Eduardo Puente a mostrat era sua illusion per assumir era sua responsabilitat e a hijut que demore poder plaçar a joeni esportistes deth Centre ena elèit e ara Val d’Aran ath maximal nivèu esportiu.

Pera sua banda, eth vicesindic e conselhèr d’Espòrts d’Aran, Luis Carlos Medina a manifestat “contunham damb eth projècte deth 2012 damb fòrça illusion e desiram qu’es esportistes artenhen es sòns objectius esportius”.

Eth Centre ei compausat per esportistes qu’estúdien eth Bachillerat causa que les permet incorporar-se enes programes deth CETEI d’esquí aupin subvencionat e patrocinadi peth Conselh Generau d’Aran. Ath delà, der esquí de hons e diuèrses des especialitats individuaus de gèu, coma eth patinatge artistic.

Eth Conselh Superior d’Espòrts dèc eth vist e platz ara creacion deth Centre Especializat ena Tecnificacion Esportiua d’Espòrts d’Iuèrn dera Val d’Aran, impulsat peth Conselh Generatz d’Aran que se cargue de gerí’c.