Era passada dimenjada se celebrèc era 1a fasa dera Copa Espanha enes estacions de Baqueira-Beret e Espot.

Eth diuendres se disputèc eth Supergigant en Baqueira ena quau Ramón Barrufet, deth CAEI, artenhec eth dusau melhor temps per darrèr de Marco Sánchez, dera Federacion aragonesa.

Ena categoria femenina, Carmela Olmo, tanben deth CAEI, artenhec un destacat 4au lòc en tot èster des mès joenes dera categoria.

Eth dissabte e eth dimenge es equipes se desplacèren a Espot entà disputar dues SL donques que per fauta de nhèu non se podie hèr GS.

Er aranés deth CAEI, Pol Salvat, guanhèc eth prumèr dia damb un avantatge de lèu un segon sus eth dusau classificat, Andrés Trujillo dera Federacion aragonesa. Eth tanben esquiador deth CAEI, Ramon Barrufet, demorèc 3au.

Eth dimenge, es dus esquiaires deth CAEI tornèren a pujar ath calaish mès aguest còp ena dusau, Barrufet, e tresau posicion, Salvat.

Eth sòn entrenador comente que “es resultats mos an estonat pr’amor que non auíem entrenat en nhèu dura” e que “mos demore fòrça trabalh entà èster competitius a nivèu internacionau”.

Aguest resultat place a Salvat e Barrufet prumèr e dusau respectivaments dera Copa Espanha. Era dusau fasa se disputarà en Formigal a finaus de hereuèr.