- En Canadà se tròben es principaus campions espanhòus de patinatge artistic sus gèu: Javier Fernández (bicampion deth mon), Javier Raya, Sonia Lafuente, Celia Robledo e Luis Fenero.
Tòn Cónsul damb eth sòn entrenador, Bruno Marcotte.
Eth patinador aranés de 18 ans, Tòn Cónsul Vivar, joena promesa dera elèit deth patinatge artistic, marcharà eth pròplèu 7 de junhsèga tà Canadà (Montreal) a on començarà era sua carrèra professionau jos es ordes de Bruno Marcotte, qu’actuauments a ena sua equipa ara parelha campiona deth mon 2016, formada per Meagan Duhamel e Eric Radford.
Bruno Marcotte, ei considerat coma un des melhors entrenadors de parelhes deth mon, era parelha deth patinador aranés ei era canadiense, Alexane Bouillon, de 13 ans.
Tòn Cónsul, a manifestat “contunharé trebalhant a nivèu individuau e er objectiu ei obtíer en deseme eth campionat d’Espanha en Vielha. Eth trebalh que realizam ei a long termini, Alexane e jo encara èm joeni, sonque cau veir qu’es campions deth mon Meagan Duhamel e Eric Radford an mès de 30 ans”.
Tòn, encara ei júnior e a estat es dus darrèri ans subcampion d’Espanha, eth sòn entrenador, Bruno Marcotte, li a explicat qu’en gèr de 2017 serà eth moment d’obtíer punts entà poder anar ath Mondiau dera China (març de 2017).
Eth patinador deth FC Barcelona, Tòn Cónsul, tanben contunharà era sua formacion academica e estudiarà Administracion e Direccion d’Empreses a distància ena Universitat de La Rioja.
Tòn Cónsul Vivar, de 18 ans, becat peth Consell Català de l’Esport, a residit des deth 2013 ena residéncia Blume (Barcelona) a on entrenaue individuau jornalièraments damb eth FCB ath costat deth sòn entrenador, Patrick Capmartin.
Tòn, signèc un convèni damb eth Conselh Generau d’Aran e Foment Torisme Val d’Aran entà promòir era destinacion toristica esportiua Val d’Aran peth mon, representada ena imatge e enes valors deth joen patinador, e dera equipa que hè part, mejançant eth patrocini institucionau.
En paraules deth vicesindic d’Aran e conselhèr d’Espòrts, Luis Carlos Medina “ei un orgulh veir coma eth trabalh e esfòrç de Tòn se ven recompensadi e que marche tà Canadà signifique qu’auem ath nòste joen esportista damb era elèit mondiau de patinatge. Ei ua satisfaccion entara sua familha e entà toti es qu’èm ath sòn costat dant-li eth nòste supòrt veir coma arribe arrinque era sua carrèra professionau ath mès naut nivèu esportiu. Li desiram fòrça sòrt en aguesta naua etapa, que gaudisque dera experiéncia e que torne lèu a visitar-mos!”.
Vielha, 1 de junhsèga de 2016
Conselh Generau d’Aran: Núria Sanjuan