• Eth pròplèu 26 de març, eth Plan de Beret acuelherà un acte d’aumenatge a Pau Donés que cerque congregar as seguidors der artista ena Val d’Aran, territòri ath que tostemp se mostrèc fòrça estacat e a on deishèc ua peada inesborrable

Son mès de 500 es persones que dejà s’an inscrit en “El Valle Grita” e que participaràn en er enregistrament d’aguest videoclip collectiu que preten amassar a totes es persones que volguen retre aumenatge a Pau e interpretar un des sòns tèmes mès significatius: Grita, en un païsatge unic qu’aufrís eth Plan de Beret.

Tà poder participar en aguest acte e gaudir d’ua jornada de musica, art, amistat e natura, sonque cau inscriuer-se (de forma totauments gratuïta) ena web https://www.elvallegrita.org/ e descargar era basa musicau que s’utilizarà coma referéncia pr’amor qu’es assistents poguen hèr era sua interpretacion. Toti aqueri que volguen, poderàn assistir tanben damb es sòns estruments.

Eth promotor dera idèa, eth music zamoran Mario Carnero, apassionat dera Val d’Aran e es sues montanhes, insistís que se tracte d’un aumenatge daurit ath que volgue participar: “Non ei de besonh èster music professionau entà participar en “El Valle Grita”, sonque cercam qu’es votzes e estruments resonen en aguestes montanhes que Pau tant estimaue, e que siguen testimònis d’un acte unic en sòn rebrembe”.

“Des deth Conselh Generau d’Aran èm immensament arregraïdi as promotors d’aguest acte, donques credem qu’ère de besonh hèr un tribut ara figura de Pau Donés, ua persona que hec molt pera Val d’Aran e que deishèc en nosati un rebrembe fòrça especiau a trauès des sues accions e era sua musica”, apunte eth conselhèr d’Economia, Torisme e Promocion Economica, Juan Antonio Serrano .

Aguest eveniment compde damb era collaboracion deth Conselh Generau d’Aran, er Ajuntament de Naut Aran, era estacion d’esquí Baqueira Beret e dera Orquèstra Sinfonica dera Escòla de Musica der Orfeon Lheidatan.

Vielha, 14 de març de 2022