Vielha, 3 d’agost de 2017.- Es jogadores e es integrants deth còs tecnic dera prumèra plantilha deth RCD Espanyol Femenin que realizen eth sòn stage de pretemporada ena Val d’Aran, an estat arrecebudi en Conselh Generau d’Aran pera conselhèra de Torisme deth Govèrn d’Aran, Anna Díaz.

Pendent era recepcion era conselhèra Díaz, a volut arregraïr eth hèt qu’ua equipa de fotbòl femenin coma er Espanyol, contunhe en tot apostar entà amiar a tèrme era sua preparacion d’ostiu ena Val d’Aran, donques qu’a dit, era preséncia d’equipes de naut nivèu e era sua relacion damb era Val d’Aran, mos ajude fòrça.

Era delegacion dera equipa femenina deth RCD Espanyol a estat acompanhada peth vice-president deth Conselh d’Administracion deth club, Carlos García Pont.

Pendent er stage de preparacion era equipa deth RCD Espanyol Femenin a disputat un partit amistós contra era equipa A.F. Les Femenin, enes installacions deth camp de fotbòl de Garòs, en Naut Aran.