Er Espitau Val d’Aran amplie es critèris tara remassada de mòstres PCR tara deteccion dera infeccion per COVID-19

  • A compdar deth nau protocòl publicat peth Ministèri de Sanitat eth passat 6 de mai, er airau d’Atencion Primària der Espitau Val d’Aran poirà remassar mòstres PCR as persones damb sintomatologia d’inici recent, independentament dera sua gravetat, tostemp jos es critèris des professionaus sanitaris

Des der inici dera crisi sanitària, er Espitau Val d’Aran, a trauès der airau d’Atencion Primària d’Aran a estat remassant mòstres PCR entà diganosticar era malautia, tant en pròpri espitau coma enes domicilis des pacients en isolament.

Era diferéncia de procedement damb eth nau protocòl residís en qu’ara, aguesta pròva poirà realizar-se a tota aquera persona que presente simptòmes compatibles d’infeccion per coronavirus d’inici recent, independentment dera sua gravetat, tostemp aplicant eth critèri des professionaus dera salut.

Aguest cambi s’enten en contèxte actuau de transicion dera pandemia deth COVID-19 damb ua incidéncia mès baisha dera malautia, en qué pren fòrça importància auer un diagnostic anticipat des naui casi entà poder recomanar er isolament domiciliari e realizar estudis de contacte de risc deth cas confirmat, e evitar atau un nau rebròt.

Entà Maria Vergés, vicesindica e conselhèra d’Igualtat, Salut de Benèster deth Conselh Generau d’Aran: “aguest ei un pas important entà auançar ena deteccion precòç dera malautia e ua bona noticia entà Aran pr’amor que mos facilitarà eth trabalh en cas de detectar-se bèth positiu” e higie que “er esfòrç que s’a amiat a tèrme des der airau sanitari deth Conselh Generau d’Aran a estat clau entà superar era fasa critica d’aguesta pandemia e cau arregraïr a toti es sòns professionaus eth trabalh qu’an amiat a tèrme, e que seguissen desvolopant, tà mantier era situacion controlada”.

Cau rebrembar qu’era tecnica PCR balhe informacion dera preséncia dera malautia, non ei ua tecnica tà comprobar immunitat o anticòssi sus era malautia quan aguesta ja ei passada o en fasa de convalescéncia. En aguest sens, cau destacar tanben qu’aguesta pròva se realize, en cas d’Aran, en laboratòri der espitau Arnau de Vilanova.

Comments are closed.