Er eveniment definitiu deth 50 Anniversari de Baqueira Beret: BBB Ski Race Experience

Baqueira_BBB

Era estacion de Baqueira Beret a dessenhat un eveniment open entà esquiaires a compdar des 6 ans ena quau se barregen pròves d’aupin, boardercross e freeride damb er emergent art des selfies enes punts mès nauti dera estacion Era diversion ei assegurada!

Eth dissabte 17 de gèr fòrça esquiaires pujaràn as pistes de Baqueira damb ua illusion ahijuda: era de participar en ua pròva a miei camin entre era diversion e era competicion. Se tracte dera BBB Ski Race Experience. Es tres “B” corresponen as sigles des sectors de Baqueira, Beret e Bonaigua e era definicion d’ “Experience” ath hèt qu’er eveniment permeterà recórrer cornèrs dera estacion sus esquís o surf de nhèu que jamès auien dralhat.

Era pròva ei eth classament individuau, maugrat açò, se pòden realizar es trams de ligam eth grop, mès que mès es mès petiti damb es sòns clubs o familhes. Sense dobte seràn es moments entà comentar era baishada realizada e analisar eth següent rèpte.

Totes es pròves poderàn realizar-se entre es 10h00 e es 14h00 deth dissabte 17 de gèr. Donques era gessuda non serà en massa mès que poderà hèr-se individuauments en Orri. Eth village e eth burèu de carrèra entà arrecuélher eth dorsau a compdar des 9h00 am seràn deuant eth Moët Winter Lounge, e ei a on se haràn es inscripcions de darrèra ora (enquiàs 12h00.)

Er art dera polivalència sus esquís e surf de nhèu

Eth circuit de boardercross serà plaçat en Blanhiblar, en Beret. Aquiu es participaires baisharan per un traçat sinuós e damb dubbies e compdarà eth temps. Eth gigant se disputarà en Stadium de Baqueira e se puntuarà tanben segons temps realizat. Era tresau pròva, era de dehòra pista, serà eth Bonaigua-Peülla ena zòna inferiora dera Pala Grana. Se puntuarà segons critèri deth Freeride World Qualifier. Se pòt participar tant en esquís coma en surf de nhèu mès eth classament serà amassa.

Mès non tot va tà deishar-se ara perícia der espòrt. Es que volguen somar mès punts pòden prener-se 4 selfies enes balises deth 50 anniversari que son plaçades enes punts mès nauti dera estacion: Dossau, Cap de Baqueira, superior TQ Tuc dera Lança e superiora TSD Peülla. Cada imatge somarà 25 punts extres. Es fòtos auràn de presentar-se eth madeish dia en centre comerciau de Ruda entre es 16h00 e 18h00 a on entàs 19h00 se realizarà era hèsta de liurament de prèmis.

Entà obtier era puntuacion finau se somaràn es punts des 3 pròves autrejadi segons era posicion deth classament. Ad aguesti se somaràn es punts extres des selfies. En cas d’egalizacion, se prenerà coma desempat eth temps realizat en gigant.

Prèmis de nautada e sorteg

Se premiarà as 3 prumèrs classificadi de cada categoria, òmes e hemnes, damb trofèu especiau 50 anniversari, un libre commemoratiu e un cors de conduccion Audi Driving Experience (a compdar de categoria sènior). Se liurarà tanben un prèmi especiau ath corredor mès joen e ath corredor de mès edat. Toti es participants seràn obsequiats damb un tubular Buff 50 anniversari edicion limitada. Ath delà, se realizarà un sorteg de regals e materiau d’esquí Salomon entre toti es participants.

Era organizacion dera pròva BBB50 Ski Race Experience se resèrve eth dret de modificar o anullar eth programa en tot depéner des circonstàncies meteorologiques o de seguretat.

Categories

En categories, tant femenines coma masculines, se dividissen en:

INFANTIL: de 6 a 11 ans (2008 – 2003)
JUVENIL: de 12 a 18 ans (2002 – 1996)
SÈNIOR: de 19 a 29 ans (1995 – 1985)
VETERANS 1: de 30 a 50 ans (1984 – 1964)
VETERANS 2: mès de 50 (>1964)

Inscripcions

Era Inscripcion ei gratuïta mès entà participar ei obligatòri eth segur de 5 ?. Limit d’inscripcions 500 participants.

Punts entà inscriuer-se:

. Burèu Baqueira1500 (Radio Aran)
. Abans dera competicion eth punt de gessuda d’Orri en Village der eveniment.
(Deuant eth Moët Winter Lounge).
. Telefòn: 973 639 044
. Hèsta liurament de prèmis entàs 19h00 en Centre Comerciau de Ruda

Comments are closed.