Vielha, 07 d’abriu de 2016.- Es responsables der Institut entath Desvolopament e Promocion deth Naut Pirenèu e Aran (IDAPA), an presentat aué en Conselh Generau d’Aran eth metòde SENDIF, a trauès deth s’establissen es critèris entà determinar eth grad de dificultat des itineraris a pè pes camins e sendèrs. Era presentacion s’a produsit pendent eth transcors dera reünion dera Taula de Senderisme deth Naut Pirenèu e Aran.
Aguesta guida que hè quate mesi qu’ei creada e qu’encara ei laguens deth periòde de pròva, ei un nau estrument entà informadors toristics e tecnicians en senderisme, dirigida a tot tipe de public.
Eth director deth IDAPA Pere Porta, expliquèc qu’eth metòde nèish pr’amor que se detectèc qu’auie ua vintea desparièra de manères d’explicar “es dificultats” tant fisiques coma tecnicianes des itineraris, ua informacion que tostemp ei presenta en quinsevolh rota que sigue , entà poder unificar era manèra de compdà’c e entà que aguesta informacion sigue çò mès ajustada possibla ara realitat.
SENDIF s’a elaborat damb es aportacions sorgides des conclusions de dus seminaris tecnics de debat e era participacion d’ua trentia d’expèrts.
Era naua guida, en format digitau que se pòt consultar ena pagina web www.sompirineu.cat/som-senderisme/sendif
Pera sua part, era conselhèra de Torisme Ana Díaz, qu’a presidit era reünion dera Taula de Senderisme deth Naut Pirenèu e Aran, se felicitèc per aguest nau estrument e nomentèc es accions deth Conselh Generau d’Aran entà promòir e difóner es 22 rotes e sendèrs deth Naut Aran, Mijaran e Baish Aran. Díaz, expliquèc qu’aguesta promocion se hè a trauès de Torisme Val d’Aran e qu’eth Govèrn d’Aran trabalhe continualaments ena adaptacion, era melhora e era senhalizacion des desparièrs camins e sendèrs, atau coma ena dubertura de naues rotes coma en cas deth nau projècte de senhalizacion e accès ath Tuc deth Montlude. Era conselhèra tanben s’a referit ara promocion des rotes de biciclèta e BTT dera Val d’Aran, ua des escomeses entàs pròplèus mesi e ath prètzhèt que se desvolòpe amassa damb es enterpreses araneses de senderisme e torisme actiu.
Era conselhèra Anna Díaz, anoncièc qu’eth metòde SENDIF, que tanben includís recomanacions entàs usatgèrs, aurà era sua version en aranés qu’anarà a cargue deth departament de Politica Lingüistica deth Conselh Generau d’Aran.
Pendent era amassada, es responsables tecnicians der IDAPA, anoncièren era creacion d’un Hestivau de Senderisme deth Pirenèu.