• Eth Prèmi Lengua Viua s’a liurat enguan ath grop musicau Sarabat.

• Un an mès, era edicion dera Corsa a compdat damb eth supòrt deth Conselh Generau d’Aran, de d’autes institucions e d’entitats privades araneses.

 Era 32au edicion dera Corsa Aran Per Sa Lengua que se celebrèc ager tornèc a reivindicar era necessitat de potenciar er usatge sociau der aranés en toti es airaus dera vida vidanta.

Era iniciativa, organizada per Lengua Viua, compdèc damb eth supòrt deth Conselh Generau d’Aran, d’autes institucions e d’entitats privades araneses, que collaborèren entà hèr possible ua naua edicion d’aguesta jornada en defensa dera lengua pròpia d’Aran centeats de persones vengudes de desparièrs lòcs deth país participèren enes gessudes tradicionaus de Les, Montgarri e eth Pòrt de Vielha, portant era samarreta oficiau d’enguan, dessenhada per Maria Castet, damb eth lèma “Èm aranesi, parlam aranés”, un messatge entà encoratjar tant ara populacion aranesa com as nauvengudi a parlar era lengua pròpia d’Aran.

Era hèsta finau se hec ena plaça d’Aran de Vielha, a on Lengua Viua tornèc a hèr ua crida ara conscienciacion collectiva sus era situacion actuau der aranés. Eth collectiu soslinhèc qu’era lengua ei coneguda e compresa per ua grana part dera populacion, mès qu’eth sòn usatge sociau ei fòrça redusit, e reclamèc ua major preséncia der aranés, especiaument ena educacion infantila.

Eth Prèmi Lengua Viua a estat entath grop aranés Sarabat

Ath long der acte finau se liurèc eth Prèmi Lengua Viua ath grop Sarabat, en reconeishement ara sua trajectòria coma prumèr grop de musica en aranés e pera creacion dera cançon Aran per sa Lengua, presentada en 2024 en motiu des 30 ans dera Corsa. Tanben se liurèc eth prèmi ath dessenh dera samarreta d’enguan. Era jornada se barrèc damb eth tradicionau concèrt de Nadau, qu’animèc era plaça damb un repertòri de cançons occitanes.

Eth Conselh Generau d’Aran vò relheuar e arregraïr era implicacion de Lengua Viua, des persones volontàries, des collaboradors e de totes es institucions e entitats que hèn possible, an darrèr d’an, era celebracion dera Corsa Aran per sa Lengua, ua iniciativa clau entà mantier viu er aranés e refortir eth compromís collectiu damb era sua promocion e normalizacion.

Vielha, 27 de junhsèga de 2026