Era 36au Edicion dera Marxa Beret compde enguan damb eth Campionat d’Espanha de longa distància

Era 36au Edicion dera Marxa Beret aurà lòc pendent era dimenjada deth 30 de gèr ar 1 de hereuèr de 2015 en Plan de Beret

Beret acuelherà eth Campionat d’Espanha de Longa Distància d’esquí de hons eth dissabte 31 de gèr

Es inscripcions per Internet se barren eth 29 de gèr

BERET_

An darrèr an, era prumèra dimenjada de hereuèr s’amassen a Baqueira Beret (Plan de Beret) milèrs de hondistes entà participar ena Marxa Beret. Se tracte dera melhor pròva esportiua de hons d’Espanha, ath delà, era carrèra aranesa ei puntuable FIS e ei laguens deth calendari Euroloppet qu’amasse es marches populares d’esquí de hons mès importants d’Euròpa.

A compdar deth1978 era Marxa Beret se ven celebrant e ath viatge se mielhore tant era qualitat coma eth numerò d’inscriti. En tot auer en aguesti moments ath torn de 1000 participants.

Eth pròplèu 1 de hereuèr de 2015 se celebrarà era 36 edicion d’aguesta carrèra damb er objectiu d’ua major participacion e arténher ua posicion mès internacionau. Era carrèra prepause 3 distàncies: 10, 21 e 42 km. Que transcorren peth Plan de Beret a 1.850m d’altitud e que passen peth pòble de Montgarri.

Aguesta edicion, era preparacion ei mès intensa a causa dera adaptacion dera competicion as exigéncies que compòrte era organizacion des Campionats d’Euròpa de Longa Distància donques qu’era Marcha Beret a estat era sedença escuelhuda entara organizacion d’aguest eveniment entara sason 2015/2016.

Era Marxa Beret ath delà d’atrèir a participants de naut nivèu coma er esquiador basc dera Reau Federacion Deportis d’Iuèrn (RFEDI) Ioseba Rojo, guanhador dera passada edicion, tanben atrè a grana quantitat de familhes e grops d’amics que participen de manèra populara. Era organizacion tanben a soslinhat qu’entre es corredors d’elèit presents i aurà participants e Finlàndia, Norvègia, Estònia e França.

Campionat d’Espanha de longa distància

Eth dissabte 31 de gèr se realizarà en Plan de Beret eth Campionat d’Espanha de longa distància, ua pròva d’estil liure (Skating) qu’aurà dus recorreguts, un de 15 Km. e un aute de 31 Km. Era pròva ei laguens des activitats que se realizen damb motiu dera 36au Marxa Beret.

Era Marxa Beret ei organizada peth Conselh Generau d’Aran, Baqueira Beret e er Ajuntament de Naut Aran damb era collaboracion dera Associacion Volentaris Val d’Aran e d’auti organismes, ath delà dera Reau Federacion Espanhòla Espòrts d’Iuèrn e era Federacion Catalana Espòrts d’Iuèrn.

Es inscripcions via Internet son daurides enquiath 29 de gèr (www.marxaberet.com).

Comments are closed.