Era ACM a celebrat aguest maitin ena sedença deth Conselh Generau d’Aran ua naua jornada entà estudiar, melhorar e innovar era sua centrau de crompes enes municipis dera Val d’Aran. Actuauments, des 9 municipis dera Val d’Aran, 3 crompen servicis a trauès dera centrau de crompes.

Damb aguestes jornades era ACM cerque dar responsa a que municipis petiti e mejans dera Val d’Aran agen igualtat d’oportunitats, prètzi e condicions qu’es grani. “En territòris coma Aran aguest hèt pren fòrça importància e era ACM vò dar-i responsa” a explicat eth secretari generau dera ACM, Marc Pifarré en marc dera inauguracion dera jornada. Pera sua banda eth vicesindic d’Aran, Luís Carlos Medina, a explicat qu’era centrau de crompes “ei principau entàs municipis d’Aran a on per eri soleti non pòden arténher era possibilitat d’arténher melhors condicions economiques. Era ACM hè un bon favor ara Val d’Aran.”

Era jornada celebrada aué ena Val d’Aran a compdat damb ua quinzea de persones e a per objectiu méter en comun bones practiques que s’amien a tèrme enes diferenti municipis de Catalonha. Tanben a servit entà divulgar es rèptes que supausarà era Directiva 2014/24/UE, avalorar afectacions ena contractacion en matèria de transparéncia o identificar naui besonhs e conéisher pròplèus licitacions dera Centrau de Crompes.

Actuauments, era centrau de crompes deth mon locau, mejançant eth Consòrci Catalan peth Desvolopament Locau, permet aquerir diferenti servicis coma es subministraments d’electricitat, subministrament de gas naturau, era contractacion d’assegurances, era crompa o rènting de veïculs de servicis generaus e servicis policiaus, e imprimaries e equipes de multifuncion. Era volontat ei qu’es entitats locaus poguen arténher prètzi avantatjosi, estauviar e facilitar eth procediment administratiu, aportar expertesa e coneishença der aqueriment e garantir maximala seguretat juridica. Des dera Centrau de Crompes se velhe pr’amor qu’era indústria locau non demore ath marge.

Ei previst qu’enes pròplèus mesi s’aufrisque eth servici de crompa de papèr de burèu, maquinària entàs brigades municipaus e equipes d’informatica.