Era associacion Es Paums edite eth disc Es Paoesses canten a Mossen Condò

  • Eth CD ei dejà ara venta enes libreries dera Val d’Aran e inclodís, ath delà des òbres musicaus de Condò, ua cançon naua: Accion de Gràcies

  • Era presentacion d’aguesta produccion auec lòc pendent era celebracion des hèstes majors de Vilamòs

Damb motiu des hèstes majors de Vilamòs, eth passat diuendres, 16 d’agost, auec lòc ena glèisa de Santa Maria era presentacion deth disc Es Paoesses canten a Mossen Condò, que ei dejà ara venta enes libreries dera Val d’Aran.

Eth CD a estat editat pera associacion Es Paums, damb era collaboracion deth Conselh Generau d’Aran e der Ajuntament de Vilamòs, que damb aguesta produccion an volut remercar era facieta mens coneishuda de Mossen Condò, era de music.

Aguesta ei era aportacion dera associacion Es Paums ara commemoracion deth centenari dera mòrt der illustre escrivan de Montcorbau, que se celèbre enguan.

Ath delà des òbres musicaus de Condò cantades pera corau Es Paoesses de Vilamòs, eth disc includís ua cançon naua dedicada a Mossen Condò: Accion de Gràcies, damb letra de Jèp de Montoya e musica de Jaume Masana Castet.

En acte de presentacion deth dia 16 sigueren presents, ath delà des pròpis autors, er alcalde de Vilamòs e conselhèr d’Aran, Oriol Sala, eth president d’Es Paums, Tònho Castet, e eth secretari dera associacion, Jose Antonio Castet Villamates.

Era corau Es Paoesses aufric un concèrt dissabte, 17 d’agost, entà barrar ua semana plia d’activitats damb motiu des hèstes majors deth pòble.

Entre es mès de vint activitats programades per ajuntament municipau cau destacar eth sopar popular Paelha Paoessa, era Missa cantada en aranés, era procession e cantada des Gòis de Sant Ròc, eth Torneg de Padel e eth de Tennis Taula, era exposicion de pentures d’Alfonso de la Risca, era session de Cinèma ara fresca o es activitats tara mainadèra, entre moltes d’autes. Ues hèstes que compdèren damb ua nauta participacion ciutadana!

Comments are closed.