Ager, dia 3 de junh, pendent er acte de liurament des prèmis dera Federacion Catalana d’Espòrts d’Iuèrn en Musèu Olimpic e der Espòrt Joan Antoni Samaranch de Barcelona, era Associacion Volentaris Val d’Aran arrecuelhec eth IIIau Prèmi Collaborador e Espòrt Pitu Figueras 2015, en reconeishença as valors der espòrt

Aguest guerdon ei ua iniciatiua dera Junta Directiva dera FCEH damb er objectiu de hèr visible eth papèr des collaboradors e volontaris enes espòrts d’iuèrn. Era Comission deth prèmi, formada per 5 membres, decidic arreconéisher a tota era equipa de mès de 120 volontaris dera Val d’Aran era sua desinteressada dedicacion envèrs eth mon dera competicion d’espòrts d’iuèrn, es prètzhèts de volontariat de tot tipe qu’amien a tèrme, es sues dots organitzatives, eth sòn esperit collaboratiu e era sua capacitat entà amassar e motivar ua grana equipa uman tant a nivèu esportiu, coma sociau e uman. En representacion de toti es volontaris arrecuelhec eth prèmi eth president dera Associacion, Roberto Boya.

Eth prèmi, liurat per Pep Figueras, hilh deth Doctor Pitu Figueras, siguec ua escultura singulara creada peth gendre deth Dr. Figueras, Iñaki Castillo, allegorica as valors d’altruisme e de trabalh desinteressat per espòrt, cossent damb er esperit qu’eth Dr. Josep Mª Figueras practiquèc pendent tota era sua vida.

Er acte compdèc damb era preséncia deth vicesindic d’Aran en foncions, Luis Carlos Medina, deth baile de Vielha e Mijaran en foncions e Deputat en Parlament de Catalonha, Álex Moga, e deth tinent de baile de Vielha e Mijaran en foncions e Deputat Provinciau, Pau Perdices.