-
Era iniciativa, impulsada peth Conselh Generau d’Aran e que compde damb era collaboracion deth Grèmi d’Ostalaria dera Val d’Aran e der Institut entath Desvolopament e era Promocion der Alt Pirenèu e Aran (IDAPA), a permetut apropar er aranés ara vida quotidiana des establiments comerciaus e ostalèrs dera Val d’Aran. -
Era campanha a distribuït 691 adesius damb 36 mots en aranés, repartidi en sies categories d’establiments, entà fomentar er usatge e era visibilitat dera lengua pròpia d’Aran.
Eth Conselh Generau d’Aran a presentat, aguest maitin, es resultats dera campanha «ACÍ NE DIDEM», ua iniciativa destinada a fomentar er usatge e era visibilitat der aranés enes establiments comerciaus e ostalèrs dera Val d’Aran, damb ua participacion de mès deth 97% deth sector.
Aguesta accion a compdat damb era collaboracion der Institut entath Desvolopament e era Promocion der Alt Pirenèu e Aran (IDAPA) e eth supòrt deth Grèmi d’Ostalaria dera Val d’Aran e Foment Torisme Val d’Aran, damb er objectiu de reforçar era preséncia dera lengua pròpia deth territòri enes espacis de relacion quotidiana damb era ciutadanetat e es visitants.
Era campanha ei laguens dera mèrca «EN ARANÉS ÒC», presentada en noveme de 2025 coma distintiu entà identificar es accions destinades ara promocion, difusion e metuda en valor der aranés.
Era prumèra accion de “EN ARANÉS ÒC” siguec eth lançament dera campanha «ACÍ NE DIDEM», que permetec dar a conéisher mots en aranés associats ara sua imatge, mejançant diferenti supòrts de comunicacion, coma autobusi, roll-ups, parasoleis e hilats sociaus, damb paraules coma audèth, huec, hemna, nhèu, solei o parpalhòla, entre d’autes.
Ua campanha damb ua ampla participacion deth sector
Era dusau iniciativa a arribat a establiments comerciaus e ostalèrs de tota era Val d’Aran, damb ua participacion de mès deth 97%, hèt que demòstre era bona acuelhuda dera campanha e era implicacion deth sector ena promocion dera lengua pròpia.
En totau s’an distribuït 691 adesius damb 36 mots en aranés, organizadi en sies categories d’establiments, damb vocabulari vinculat as productes, servicis e activitats que se desvolòpen en cada un d’aguesti espacis.
Era distribucion territoriau dera campanha a comprenut es tres zònes dera Val d’Aran damb eth següent nombre d’establiments:
- Baish Aran: 156.
- Mijaran: 359.
- Naut Aran: 176.
D’aguesta manèra, era campanha a permetut hèr present er aranés en espacis comerciaus e ostalèrs de tot eth territòri, en tot facilitar qu’es persones residentes e es visitants poguen identificar e familiarizar-se damb paraules dera lengua pròpia d’Aran.
Er aranés, ua lengua presenta ena vida quotidiana
Er objectiu dera campanha a estat apropar er aranés ara ciutadanetat e fomentar-ne er usatge de forma naturau, visibla e accessibla, especiaument en aqueri espacis a on se produsís ua relacion dirècta entre es establiments, era poblacion locau e es visitants.
Aguesta iniciativa tanben a volut méter en valor era implicacion deth sector comerciau e ostalèr ena preservacion e promocion dera identitat lingüistica e culturau dera Val d’Aran.
En aguest sens, eth Conselh Generau d’Aran a destacat era importància dera collaboracion entre es institucions, es entitats sectoriaus e es establiments entà garantir era preséncia der aranés enes activitats quotidianes e contribuïr ara sua normalizacion.
Ua dusau fasa entà ampliar era sua difusion
Dempús dera distribucion des adesius enes establiments, era campanha contemple ua dusau fasa de difusion digitau e audiovisuau, damb er objectiu d’ampliar eth sòn abast e fomentar eth coneishement deth vocabulari aranés.
Aguesta naua etapa includís era elaboracion de contenguts entàs hilats sociaus, mejançant reels, carrusèls e istòries, atau coma accions de difusion audiovisuau damb Lleida TV, entà dar major visibilitat as mots dera campanha.
Ath delà, era iniciativa contemple facilitar traduccions gratuïtes entà afavorir er usatge der aranés enes establiments e contribuir ara incorporacion progressiva dera lengua pròpia enes sues comunicacions.
Eth Conselh Generau d’Aran, per miei der airau de Politica Lingüistica, reafirme eth sòn compromís damb era promocion e normalizacion der aranés, en tot impulsar accions que contribuïsquen a incrementar-ne era preséncia enes espacis publics e ena vida quotidiana dera Val d’Aran.
Vielha, 18 de noveme de 2026