Vielha, 5 d’octobre de 2018.- Era Comission d’Urbanisme d’Aran, amassada aué ena sedença deth Conselh Generau d’Aran, informèc favorablaments sus eth bastiment deth nau angar der elipòrt de Vielha. Dempús de toti es informes de tramitacion e ar èster considerada ua installacion d’interès public, fin finau s’a aprovat eth bastiment deth nau angar en aguest equipament, que serà bastit era primauera der an pròplèu segontes informèc eth sindic d’Aran, Carlos Barrera, ath finalizar era reünion dera Comission d’Urbanisme. Eth sindic d’Aran tanben a explicat qu’er elipòrt disposarà dera operativitat es 24 ores ath dia a finas d’octobre o coma fòrça tard principis deth mes de noveme.
Er elipòrt de Vielha, acuelh actuauments operacions deth Servici d’Emergéncies Medicaus, rescats de montanha, avitualhament e traslat de residus de refugis de montanha, atau coma servicis de trabalhs aeriani en nauta montanha e de vòls toristics de eliesqui. Damb es naues accions previstes se melhorarà era sua capacitat entà dar contunhitat ad aguestes operacions e acuélher d’autes naues.
Eth secretari d’Abitat Urban e Territòri dera Generalitat de Catalonha, Agustí Serra, manifestèc que, en çò que tanh ath Plan d’organizacion urbanistica municipau d’Arres, era Comission d’Urbanisme d’Aran a analisat aguest planejament e a acordat redusir de 5 a 3 es poligons de creishement urbanistic deth municipi d’Arres enes sòns tres nuclèus de, Arres de Jos, des Sus e d’Era Bordeta, de cara a preservar es valors agricòles e pagesi deth municipi. Maugrat era reduccion se poderàn bastir ua vintea d’abitatges.
Eth secretari d’Abitat Urban e Territòri a avalorat er excellent trabalh qu’en planejament urbanistic d’Arres an realizat es servicis tecnics de Lhèida e deth Conselh Generau d’Aran.
En çò que tanh ara consulta d’avaloracion ambientau dera Modificacion des Nòrmes subsidiàries de planejament en sector Escamun-2 de Les, era Comission d’Urbanisme a informat favorablaments sus era possibla utilizacion comerciau d’aguest sector ath costat deth centre comerciau dera poblacion, encara qu’abans, tau coma a explicat Agustí Serra, calerà auer resolvut eth Plan Especiau deth Garona qu’elabòre eth Conselh Generau d’Aran.
En çò que tanh ara Modificacion des Nòrmes subsidiàries e complementàries per ajust deth limit deth solèr urban en àmbit des antigues naus de Sorieus en Bossòst, eth secretari d’Abitat Urban e Territòri esclaric qu’ath tractar-se de dues naus preexistentes e ath madeish temps dera installacion de naues activitats economiques, coma ei eth cas d’ua fabrica de cervesa, era Comission d’Urbanisme a decidit aprovar aguesta modificacion.
Sus eth Plan de melhora urbana PE-6 dera Còta 1500 de Baqueira, era justificacion entà garantir era seguretat des persones en cas de desliçaments, dempús des estudis favorables der Institut Geologic de Catalonha, s’a dat conformitat ad aguesta activitat.
Pera sua part, e ath marge dera Comission d’Urbanisme, eth sindic d’Aran, Carlos Barrera, informèc sus era reünion qu’an mantengut es responsables d’Urbanisme dera Generalitat damb es Servicis Tecnics deth Conselh Generau d’Aran, sus eth besonh qu’a era Val d’Aran de disposar de terrens entath bastiment d’abitatges de loguèr sociau. En aguest sens, Carlos Barrera, hec referéncia as darrères reünions mantengudes damb eth conselhèr de Territòri e Sostenibilitat, Damià Calvet, entà garantir er accès des persones ad aguest tipe d’abitatge ena Val d’Aran. Eth sindic d’Aran, Carlos Barrera, expliquèc qu’aguesta ei ua prioritat entath Govèrn d’Aran, mès qu’entà açò ei de besonh qu’es ajuntaments meten a disposicion deth Conselh Generau d’Aran terrens a on se pogue bastir aguest tipe d’edificacions d’abitatges de loguèr sociau. En aguest sens, a manifestat qu’eth baile de Naut Aran, César Ruiz Canela, a expressat era sua disposicion entà trobar terrens disponibles en Salardú e Arties entà sajar resòlver aguesta problematica. En quan a Vielha, eth sindic d’Aran a manifestat qu’analisaràn quina ei era situacion entà veir se des deth Conselh Generau d’Aran se pòt subervier entà trobar ua solucion urbanistica que permete disposar de terrens entath bastiment d’aguest tipe d’abitatges.