Era Comission d’Urbanisme dera Val d’Aran apròve era regulacion des viuendes d’us toristic en Vielha e Mijaran

  • Aguesta modificacion des nòrmes subsidiaries e complementaries dera Val d’Aran entara regulacion d’aguestes viuendes en municipi de Vielha e Mijaran, respon ara grèu problematica en matèria de viuenda que viu Aran, un ahèr prioritari entath govèrn deth Conselh Generau

  • Era Comission d’Urbanisme a aprovat tanben era prepausa d’òbres de condicionament d’ua nau dejà existenta en municipi de Les e era adequacion d’un espaci de gestion de bòsqui publics entara produccion de biomassa

Aguest maitin a auut lòc era Comission d’Urbanisme d’Aran, a on s’a aprovat de forma definitiva era modificacion de nòrmes subsidiaries e complementaries dera Val d’Aran entara regulacion des viuendes d’us toristic en municipi de Vielha e Mijaran.

Damb aguesta regulacion, se permeterà era concession de licéncies d’us toristic en municipi en bastisses unifamilhaus e sense division orizontau, atau coma en aqueres bastisses de viuenda plurifamilhau d’un solet propietari/a enes quaus totes es viuendes se destinen ar usatge toristic. Aguesta modificacion non afectarà as abitatges que dejà compdauen damb era licéncia d’us toristic.

“Aguesta regulacion en municipi de Vielha e Mijaran respon, per un costat, ara grèu problematica en matèria de viuenda que ven patint era Val d’Aran d’un temps ençà e, d’un aute costat, da responsa tanben as molèsties que se produsissen entre era coexisténcia de visitants e abitants de longa durada”, afirmaue eth sindic d’Aran, Francés Boya, que hig que: “entath govèrn deth Conselh Generau d’Aran cercar solucions ath problèma dera viuenda ei un ahèr prioritari”.

Pendent era comission d’urbanisme s’a aprovat tanben era prepausa d’òbres de condicionament d’ua nau dejà existenta en municipi de Les e era adequacion d’un espaci de gestion de bòsqui publics, damb era conseqüent produccion de biomassa. “Des deth govèrn deth Conselh trabalham entà qu’era Val d’Aran sigue capaç de hèr ua bona gestion des sòns bòsqui, de forma que pogam profitar es milèrs de tones de husta qu’auem disponible cada an, en tot apostar per ua energia renovable e de proximitat ath còp que suenham es nòsti bòsqui e les mantenguem nets e en bones condicions”, declaraue Boya.

Era comission d’urbanisme dera Val d’Aran a aprovat eth Plan especiau urbanistic entara implantacion d’ua planta de tractament d’àrids en pòble d’Arties.

Pera sua part, a quedat en suspension era aprobacion dera propòsta dera Modificacion des Nòrmes subsidiaries e complementaries entara delimitacion deth PAU-2 de Bagergue ara demora qu’er Ajuntament de Naut Aran incorpòre quauques prescripcions.

Comments are closed.