Vielha, 5 d’octobre de 2018.- Era conselhèra de Torisme d’Aran, Anna Díaz, a avalorat positiuaments es resultats dera sason toristica d’aguest ostiu ena Val d’Aran dempús dera reünion qu’a mantengut damb es empresaris e otelèrs deth sector.

Era conselhèra a explicat qu’es donades son positiues damb ua tendéncia de creishement tan per çò qu’ei es pernoctacions coma es sojorns mieges de toristes e a remercat qu’es donades obtengudes a trauès der INE (Institut Nacionau d’Estadistica), son sus es places dubèrtes pendent es mesi d’ostiu ena Val d’Aran, comparades damb d’autes destinacions toristiques coma eth Pirenèu aragonés, de Navarra e basc, atau coma damb es des Tèrres de Lhèida e es dera rèsta de Catalonha.

Eth mes de junh, ena Val d’Aran auec ua petita devarada dera estada mejana envèrs er an 2017, qu’aumentèc pendent eth mes de junhsèga eth 6,7% e eth mes d’en agost, en que i a agut visitants pendent tot eth mes, damb un creishement deth 10,5% en comparason damb es donades der agost der an 2017.

Era conselhèra Anna Díaz a soslinhat eth pas deth Tour de França pera Val d’Aran e es diferentes pròves esportiues que s’an celebrat en ostiu coma era Pedals de Foc Non Stop, eth Trail Vielha-Molières o era concentracion motociclista RodiBook, coma eveniments importants qu’an ajudat a hèr aumentar era aucupacion aguest ostiu ena Val d’Aran.

En çò que tanh as chifres, cau destacar era aucupacion otelèra pendent eth mes d’agost, qu’a arribat ath 63,6%, çò qu’a hèt qu’era Val d’Aran age estat eth dusau destin de montanha escuelhuda pes visitants dempús deth Pirenèu Aragonés.

Entre bères ues des donades destacades, Anna Díaz a explicat qu’enguan i a agut mès de 17.000 persones qu’an utilizat eth trenèt toristic dera Artiga de Lin, qu’enguan auie coma novetat ahijuda era possibilitat de visitar eth nau Centre d’Interpretacion dera Artiga. Anna Díaz tanben a dit que de cara ar ostiu que ven s’estúdie coma refortilhar es visites en aguest nau espaci dera ribèra dera Artiga de Lin.

Per çò qu’ei era campanha d’iuèrn, Anna Díaz a anonciat qu’era prevision ei qu’es pistes d’esquí de Baqueira Beret daurisquen eth dia 1 de deseme e qu’era sason s’alongue enquiath 30 d’en abriu.

En çò que tanh ara promocion, Anna Díaz a destacat era presentacion dera Val d’Aran e Baqueira Beret en Tòquio deth passat mes de seteme, que daurís perspectiues entà aumentar eth nombre de toristes japonesi aguest pròplèu iuèrn, e es accions conjuntes de promocion damb Baqueira Beret per 18 ciutats espanhòles, pendent es mesi d’octobre e en noveme. En Madrid e Barcelona era presentacion dera sason 2018/19 de Baqueira Beret serà pendent quate dies consecutius.

Torisme Val d’Aran tanben serà presenta amassa damb era mèrca Pirenèus ena hèira Naturiva de Madrid, en Ski Show de Londres, e en Winter Show en Estocòlme per dusau an consecutiu. Anna Díaz anoncièc qu’un solet touroperador suedés a previstes 1.500 pernoctacions aguest iuèrn ena Val d’Aran.

Descargar eth document de donades: Resultats ostiu 2018