Era Deputacion de Lhèida finance un “Espitau de campanha” entara Val d’Aran

Eth dispositiu d’emergéncies entà atier accidents damb multiples victimes se premanís en 11 menutes e se n’a hèt un simulacre en Parc de Pompièrs de Vielha damb era preséncia deth president dera Deputacion de Lhèida, Joan Reñé, e deth sindic d’Aran, Carlos Barrera.

• Era Deputacion de Lhèida realizarà es òbres d’aishamplament ena carretèra de Vilamòs.

president lleida-pompiers

Era Val d’Aran dispause d’un equipament d’emergéncies que permet abilitar en 11 menutes un dispositiu de sauvament e atencion medicau aquiu a on se produsisque quinsevolh accident damb multiples victimes. Eth president dera Deputacion de Lhèida, Joan Reñé, a assistit aguest dimèrcles ath simulacre en Parc de Pompièrs de Vielha, acompanhat deth sindic d’Aran, Carlos Barrera. Aguest equipament ei des pòqui qu’existissen en Catalonha e en Estat espanhòu, e l’a finançat era Deputacion de Lhèida damb 232.415 èuros laguens des accions que s’amien a tèrme ena matèria de salut.

president lleida-espitau de campanha

Er equipament que conforme aguesta unitat mobila de sauvament cònste d’ua ambulància damb supòrt vitau auançat e un veïcul d’accion sanitària preparada entà actuar deuant emergéncies. Era atencion as victimes ena madeisha zòna permet transportar-les dirèctaments a d’auti espitaus de dehòra dera Val d’Aran, se se da eth cas. Tant eth sindic d’Aran, Carlos Barrera, coma eth president dera Deputacion, Joan Reñé, an destacat era importància d’aguest equipament, qu’ei ath madeish temps un exemple dera collaboracion entre ambdues institucions.

president lleida-ctra. vilamos

Ena madeisha visita, Reñé a signat era acta de replantejament entara melhora dera carretèra LV-5055, en tram de Pònt d’Arròs e que pòrte a Vilamòs. En un traçat de 1,2 km s’invertissen 704.309 èuros entà agranir era cauçada enquia un totau de 6 mètres. Es trabalhs, qu’an estat adjudicadi ara empresa Romero Polo, an un termini d’execucion de 12 mesi e includissen tanben era melhora deth fèrm.

Era accion se harà aguest ostiu e s’abilitarà un pas provisionau per pistes forestaus entà garantir era normalitat deth transit. Era LV-5055 ei ua carretèra estreta per a on circule un anautit numerò de veïculs, pr’amor qu’ei era unica via de comunicacion des vesins des poblacions de Vilamòs e Arres.

president lleida-arros

Pendent era visita, Reñé s’a traslladat enquiara Casa deth Senhor d’Arròs, a on a estat arrecebut pes conselhèrs, peth baile de Vielha e Mijaran, Àlex Moga, e peth president dera EMD d’Arròs e Vila, Juanjo Grijalba. Eth president a signat eth Libre d’Aunor. Posterioraments, a visitat er Ecomusèu de Vilamòs.

president lleida-arros1

Es deputats provinciaus Pau Perdices e Antoni Villas an acompanhat a Reñé ena visita institucionau ar Aran.

Comments are closed.