• Eth 19 d’agost e eth 20 d’agost eth Departament d’Agricultura, Ramaderia e Medi Naturau deth Conselh Generau d’Aran a organizat aguestes activitats tà toti es publics.
Un an mès, eth Conselh Generau d’Aran a trauèrs deth sòn Departament d’Agricultura, Ramaderia e Medi Naturau a organizat “Era net des boherons” e “Tour des arrats dromilhèrs” activitats, tà petiti e grani, de descobèrta e reconeishement des micromamifèrs dera Val d’Aran e d’aprenentatge deth metode d’estudi scientific d’aguest grop de fauna.
Era activitat, “Era net des boherons”, convide a passar ua tarde-net divertida en tot cercar as petiti mamifèrs que viuen amagadi enes nòsti bòsqui.
• Diuendres, 19 d’agost. “Era net des boherons”
Lòc: Refugi dera Honeria- Val de Toran
20:00 ores:
– Charrada audiovisuau “Micromamifèrs: animadors secrèti des nòsti bòsqui”.
21:00 ores:
– Sopar
22:00- 23:30 ores:
– Exploracion nocturna en “bòsc des boherons”.
Prètz, sopar includit: 15€ (adults), 6€ (menu infantil).
Eth dissabte, 20 d’agost, aurà lòc era activitat tà toti es publics “Tour des arrats dromilhèrs” a on poderatz conéisher d’apròp es arrats dromilhèrs grisi aranesi dera man de Lídia Freixas, investigadora especializada ena espècia.
• Dissabte, 20 d’agost. “Tour des arrats dromilhèrs”
De 10:00 enquiàs 14:00 ores (Refugi dera Honeria- Val de Toran)
– Charrada “Qué ne sabem des arrats dromilhèrs grisi?”.
– Revision e contraròtle des estacions de cria deth Projècte Liró.
Tàs 16:00 ores (Conselh Generau d’Aran- Vielha)
– Revision e contraròtle des estacions de cria de Betren.
Es places son limitades, per aquerò cau formalizar era inscripcion en tot telefonar tath Conselh Generau d’Aran (973 64 18 01) o enviant un corrèu a c.madruga@aran.org. Persona de contacte: Cristina Madruga.
Vielha, 9 d’agost de 2016
Conselh Generau d’Aran: Núria Sanjuan