Era organizacion deth Tour de França visite era Val d’Aran

• Eth Commisaire Général Responsable des Départs deth Tour de França, Yannick Goasduff, s’a amassat aué damb eth conselhèr de Territòri d’Aran, Jose A. Boya e damb eth tinent d’alcalde de Vielha e Mijaran, Jacinto Cuny, entà cercar era localizacion dera gessuda dera etapa deth Tour de França qu’acuelherà era Val d’Aran.

• Era nauau etapa deth Tour, 10 de junhsèga, començarà en Vielha e finalizarà en Arcalís.

• Eth Tour començarà eth 2 de junhsèga en Mont-Saint-Michel, ua gessuda espectaculara que reivindique era vocacion deth Tour entà mostrar es bereses deth territòri.

 

????????????????????????????????????

Eth Commisaire Général Responsable des Départs deth Tour de França Yannick Goasduff acompanhat peth conselhèr de Territòri d’Aran, Jose A. Boya, e peth tinent d’alcalde de Vielha e Mijaran, Jacinto Cuny, a visitat “in situ” diuèrses localizacions en Vielha que traslladarà ara organizacion deth Tour entà definir era gessuda.

Goasduff a manifestat “en parcatge de Vielha, carrèr Pas d’Arrú, se plaçarà eth village deth Tour a on acuelherà uns 2.500 coches dera organizacion e ues 3.000 persones acreditades, ath delà eth madeish dia dera gessuda, eth dimenge 10 de junhsèga, a compdar des 08:00 ores, i aurà ua hèsta prèvia ar espectacle esportiu” Goasduff a hijut qu’“er espaci deth parcatge ei suficient tecnicament e sonque manque definir per a on gesseràn es corredors.”

En paraules deth conselhèr, Jose A. Boya “eth parcatge de Vielha ei ideal entara gessuda dera etapa deth Tour, pr’amor que pòt acuélher as coches dera organizacion, trailers, caravana publicitària, …”. Boya a soslinhat qu’ “era coordinacion entre es administracions implicades serà clau pr’amor que pendent era dimenjada deth Tour demoram ua afluéncia toristica ena Val d’Aran d’ues 20.000 persones”.

DSC_0266

 

Yannick Goasduff, tanben s’a amassat damb era conselhèra de Torisme e Desvolopament Economic d’Aran, Anna Díaz, damb eth conselhèr d’Espòrts d’Aran, Luis Carlos Medina, damb er alcalde de Naut Aran, César Ruiz- Canela, damb tecnics deth Conselh Generau d’Aran, de Foment Torisme Val d’Aran e der Ajuntament de Vielha e Mijaran, damb es Mossos d’Esquadra, Pompièrs d’Aran, tecnics der Espitau dera Val d’Aran e deth Servici d’Emergéncies d’Aran, e es Volentaris d’Aran, ara fin de coordinar era organizacion entre totes es parts implicades.

Eth Govèrn aranés arribèc a un acòrd de collaboracion economica damb er Ajuntament de Vielha e Mijaran e er Ajuntament deth Naut Aran entà cofinançar amassa damb eth Conselh Generau d’Aran e era Secretaria Generau der Espòrt dera Generalitat de Catalonha eth còst d’aguest importantíssim eveniment esportiu, eth que n’a sense dobte ua major repercussion mediatica mondiau.

Comments are closed.