Era Querimònia retorne ara Val d’Aran

Era Querimònia a estat tres mesi en Centre de Restauracion de Béns Mobles de Catalunya (CRBMC) en Valldoreix a on s’a restaurat e s’aprocedit ara sua digitalizacion.

Eth document d’Era Querimònia siguec autrejat peth rei Jaime II en 1313 e en eth s’arremasen determinats drets consuetudinaris acceptats o modificats peth monarca.

querimonia_1

Eth document presentaue lordèra generalizada: ere ressec, auie arrupes e plegs, tanben taques de diuèrsa naturalesa, pèrtes de supòrt e restauracions antigues que provocauen tension en supòrt.

En paraules de Carme Balliu, restauradora deth CRBMC, es trebalhs de restauracion an estat entre d’auti “limpiesa mecanica entà pr’amor de desincrustar era lordèra deth document e des plecs, tanben s’a realizat ua estabilizacion dera umitat. En trebalhar es plecs, eth document a variat uns millimetres dera sua dimension iniciau (80cmx60cm)”.

querimonia_2

Pera sua part, eth cap de Patrimòni e Cultura deth Conselh Generau d’Aran, Jèp de Montoya, a manifestat “es simbèus son fòrça importants pr’amor qu’amassen e junhen as pòbles. Era lengua, er escut, er imne, eth drapèu, es figures juridiques, es dances, es compilacions legaus e eth patrimòni, son aqueri simbèus que dan identitat e a cap membre que se sent d’un pòble pòt ne vò renonciar. Ei un déuer des institucions eth susvelhar aguesti simbèus pr’amor qu’en eri va era esséncia dera identitat.”

Montoya a soslinhat que “damb aguesta intervencion en pergamin d’Era Querimònia” creiguem auer aportat un gran mès de sable ath manteniment dera identitat deth pòble aranés”

“Pendent eth procés de restauracion e digitalizacion deth document s’a procedit ara realizacion d’un vidèo de difusion, qu’arremassarà es donades istoriques e archivistiques que viren ath torn dera Carta Magna aranesa” a hijut eth sindic d’Aran, Carlos Barrera.

Aguesti trabalhs an estat promoiguts peth Conselh Generau d’Aran e peth Departament de Cultura dera Generalitat de Catalunya.

Comments are closed.