• Poder comparéisher en Plen siguec ua demana qu’era sindica d’Aran hèc a arribar ara presidenta deth Parlament de Catalunya eth passat mes de seteme, entà qu’era compareishença annau esdevengue un vertadèr debat en qu’es pròpris grups parlamentaris poguen tanben presentar resolucions ath respècte

• Era compareishença se poderà seguir en dirècte en Lleida TV

Eth passat mes de seteme, era sindica d’Aran, Maria Vergés, sollicitèc ara presidenta deth Parlament de Catalunya, Anna Erra, concretar ua data entara compareishença annau dera sindica e demanèc que se podèsse amiar a tèrme en sen deth pròpri Plen deth Parlament de Catalunya.

Era sindica d’Aran a afirmat qu’amiar a tèrme era compareishença annau dera sindica en Parlament en Plen servirà entà “qu’esdevengue un vertadèr debat en qu’es pròpris grups parlamentaris poguen tanben presentar resolucions ath respècte, en tot dar un pas mes en reconeishement e desvolopament institucionau d’Aran”, atau madeish, a manifestat qu’: “eth govèrn d’Aran encara ei ara demora dera modificacion deth reglament deth Parlament entà qu’aguesta compareishença pogue amiar-se a tèrme, d’ara en endeuant, en Plen en compdes d’ena Comission d’Ahèrs Institucionaus, coma a estat enquiara”.

Aguesta compareishença ei un ahèr primordiau entà Aran e era sua maxima institucion, pr’amor que permet dar a conéisher quina ei era situacion actuau deth nòste territòri e es sòns besonhs e, ath delà servís tanben entà qu’eth Parlament de Catalunya daurisque un debat sus era situacion dera Val d’Aran.

Er acte se poirà seguir en directe a trauès deth programa especiau emetut per Lleida TV, atau coma a trauès dera web deth Parlament.

Vielha, 5 de deseme de 2023