• Aguest dijaus, 17 de hereuèr, entàs 10:00 ores, era sindica d’Aran compareisherà ena Comission d’Ahèrs Institucionaus deth Parlament entà dar compliment a çò que mandate era Lei d’Aran en sòn article 80.2 e debàter sus era situacion d’Aran e eth desvolopament deth sòn autogovèrn. Aguesta compareishença correspon ara de 2021 que non s’amièc a tèrme pr’amor dera crisi sanitària

Era sindica d’Aran, Maria Vergés, compareisherà aguest dijaus, 17 de hereuèr entàs 10:00 ores, ena Comission d’Ahèrs Institucionaus deth Parlament de Catalunya.

“Aguesta compareishença ei un ahèr primordiau entà Aran e era sua maxima institucion, pr’amor que permet dar a conéisher quina ei era situacion actuau deth nòste territòri e es sòns besonhs e, ath delà servís tanben entà qu’eth Parlament de Catalunya daurisque un debat sus era situacion dera Val d’Aran”, assegure era sindica d’Aran.

Er article 80.2 dera Lei 1/2015, deth Regim Especiau d’Aran establís que: “aumens un còp ar an s’a de celebrar un debat sus era situacion d’Aran e eth desvolopament deth sòn autogovèrn ena comission parlamentària que correspone, cossent damb eth Reglament deth Parlament. Aguest debat a de començar damb ua exposicion deth/dera sindic/a”.

Cau rebrembar qu’eth passat 14 d’octobre de 2020, eth sindic Francés Boya amiaue a tèrme era prumèra compareishença en Parlament, dera aprobacion dera Lei d’Aran en 2015 ençà,  en tot expausar era situacion que trauessauen era lengua, era sanitat, era viuenda, eth desplegament dera Lei d’Aran e er estat des competéncies que depenen dera Generalitat de Catalunya e son pendentes d’èster traspassades ath govèrn deth Conselh Generau d’Aran, entre d’auti.

Tara sindica d’Aran aguesta compareishença aurie de servir entà “qu’es madeishi grups politics amien a tèrme prepauses de ressolucion conjunta que poguen abilitar un mecanisme parlamentari qu’agilize e desplegue er autogovèrn aranés, en tot impulsar era oficina d’Aran en Parlament coma un mecanisme de coordinacion e arbitratge orientat a facilitar aguest objectiu”.

Pendent era sua visita tath Parlament, era sindica d’Aran, acompanhada per diuèrsi conselhèrs deth govèrn, a visitat tanben era oficina d’Aran en Parlament, qu’a coma objectiu establir ua comunicacion continuada entre es institucions araneses e eth Parlament de Catalunya e velhar entà qu’era realitat aranesa sigue tenguda en compde en marc des trabalhs parlamentaris.

Er acte se poirà seguir en directe a trauès deth programa especiau emetut per Lleida TV, atau coma a trauès dera web deth Parlament.

Es periodistes non acreditadi abituaument en Parlament e que volguen cobrir era compareishença, auràn de demanar ua acreditacion a premsa@parlament.cat. Ena sollicitud i an de constar eth nòm e cognòms deth professionau, eth numerò de DNI o passapòrt, eth miei de comunicacion entath quau trabalhen e s’ei redactor, fotògraf, camara o tecnic/a. Eth Parlament sonque tramitarà es peticions enviades deth correu corporatiu deth miei de comunicacion ençà.