• Eth departament d’Educacion e Formacion dera Generalitat a atengut ara demana realizada peth govèrn deth Conselh Generau d’Aran per çò que hè ara preséncia der aranés en brolhon deth decrèt d’ordenacion des ensenhaments dera educacion basica, en tot modificar eth repartiment d’ores d’aranés, qu’en brolhon constaue amassa damb es corresponentes ath catalan

Era sindica d’Aran, Maria Vergés, a mostrat era sua satisfaccion deuant dera rectificacion deth departament d’Educacion e Formacion dera Generalitat, que finaument a modificat eth repartiment d’ores d’aranés en brolhon deth decrèt d’ordenacion des ensenhaments dera educacion basica, qu’en un prumèr moment constauen amassa damb es ores corresponentes ath catalan, damb era confusion e risc qu’açò podie comportar ara ora d’aplicar aguest decrèt per part des escòles.

Es passadi dies 10 de gèr e 16 de hereuèr, era sindica d’Aran envièc dues cartes ath conselhèr d’Educacion dera Generalitat entà adreçar-li quauques preocupacions relacionades damb eth sistèma educatiu deth nòste territòri. Ua des demanes dera sindica siguec, precisament, era modificacion d’aguest decrèt abans dera sua publicacion oficiau, entà dar compliment ad aquerò qu’es leis mandaten e respectar qu’er aranés ei lengua veïculara e d’aprenedissatge en encastre educatiu aranés.