Era VaI d’Aran acuelh eth I Seminari Pirenenc de Seguiment Transfronterèr dera Fauna sauvatja

Eth Conselh Generau d’Aran, era Office Nattional dera Chasse et de la Faune Sauvage de França, eth Departament de Territòri e Sostenibilitat e eth Departament d’Agricultura, Ramaderia, Pesca e Alimentacion dera Generalitat de Catalunya an organizat eth I Seminari Pirenenc de Seguiment Transfronterèr dera Fauna Sauvatja, damb er objectiu de procedimentar e normalizar es prètzhèts conjunts sus era gestion transfronterèra dera fauna sauvatja, tant enes aspèctes tecnics coma enes de policies, atau coma era sua metodologia.

Era Audiovisuau de Vielha a acuelhut er acte d’inauguracion qu’a estat presidit peth sindic d’Aran, Carlos Barrera, peth director Général dera ONCFS, Dominique Gamon, peth director des Servicis Territoriaus d’Agricultura, Ramaderia, Pesca e Alimentacion dera Generalitat de Catalunya en Lleida, Ferran de Noguera e peth 1èr tinent d’alcalde de Vielha e Mijaran, Jacinto Cuny.

Eth sindic d’Aran, Carlos Barrera, a manifestat “era intencion deth Conselh Generau d’Aran ei repetir aguest tipe de Seminari, era conclusion serà ara fin des Jornades se serà annau o biannau, eth tot cas era Val d’Aran se vò convertir en punt de referéncia a on se hèsque aguest debat, sus era nòsta realitat, sus es nòstes montanhes e era fauna sauvatja. Ei un massís qu’ath delà dera division que pòt auer administrativa des Estats, era realitat dera fauna ei era madeisha, ei comuna en toti e aguest tipe de jornades, d’amassades e de metuda en comun d’experiéncies e prepauses de futur, son fòrça importants”.

Barrera a hijut “tanben se tracte de recuperar un convèni de collaboracion qu’auie existit hè fòrça ans. Ccomprenem qu’ei fòrça important tanben articular aguesta collaboracion, era collaboracion des còssi de gestion e de vigilància d’un costat e un aute dera termièra, per lo tant França, Catalunya, Andòrra e era Val d’Aran. E tot aguest escambi de coneishences ei important entà poder hèr ua gestion lo mès rigorosa possibla dera fauna sauvatja”.

Aué dimars, 26 d’abriu, se tractaràn tèmes de cooperacion transfronterèra damb es següentes tematiques:

– Cooperacion ar entorn dera formacion e dera informacion e es perspectives de futur.
– Cooperacion ar entorn dera policia termierèra e es perspectives de futur.
– Cooperacion en airau tecnic e es perspectives de futur.

Atau madeish, se tractaràn:

– Tèmes emergenti
– Balanç des presentacions

Pera tarde, en camp de fotbòl de Vielha se realizaràn tecniques de supòrt damb can.