• A compdar d’aué e enquiath dia 16 de seteme, eth nòste territòri acuelh eth Congrès ON.2022, sus Cans Detectors e Conservacion dera Natura, qu’a coma principau objectiu compartir es experiéncies e auanci mès relevants deth panorama nacionau e internacionau en aguest airau, atau coma debàter es besonhs de recerques futures entre toti es estaments implicadi ena conservacion dera biodiversitat
Era Val d’Aran acuelh, a compdar d’aué e enquiath 16 de seteme eth Congrès ON.2022, eth prumèr Congrès Nacionau sus Cans Detectors e Conservacion dera Natura, organizat pera associacion Odor Naturae damb era collaboracion deth Conselh Generau d’Aran, er Ajuntament de Vielha e Mijaran, Dibaq e Derwent Group.
ON.2022 a coma principau objectiu compartir es experiéncies e auanci mès relevants deth panorama nacionau e internacionau en aguest airau, atau coma debàter es besonhs de recerques futures entre toti es estaments implicadi ena conservacion dera biodiversitat.
Per aguest motiu, aguesti dies se dan cita congressistes que pertanhen ath mon scientific, investigadors, instructors e adiestradors, ONGs, representants dera administracion, personau deth mon empresariau, agents de miei ambient e forestaus, còssi e fòrces de seguretat, entre d’auti, entà compartir es sòns coneishements sus eth mon dera conservacion e era ajuda qu’apòrten es cans ad aguest airau.
Pendent aguest Congrès s’aufriràn un ampli ventalh de conferéncies, charrades e debats: deteccion canina de trafic illegau d’espècies e caça furtiva, invasions biologiques e deteccion, cans ecodetectors coma auxiliars des agents mieiambientaus, deteccion de plagues, eth papèr des unitats canines ena luta contra eth podon son sonque quauqui des diuèrsi ahèrs a tractar.
“Entath Conselh Generau d’Aran ei un plaser contribusir ara realizacion d’aguest Congrès, pr’amor que coma govèrn comprometut damb era conservacion deth nòste paisatge e biodiversitat, pensam qu’ei ua oportunitat entàs diferents estaments deth nòste territòri relacionadi damb aguest ahèr” asseguraue era sindica d’Aran, Maria Vergés.
Vielha, 14 de seteme de 2022