-
Era sindica d’Aran, Maria Vergés, a recebut aguest maitin en Conselh Generau d’Aran ath conselhèr de Drets Sociaus dera Generalitat, Carles Campuzano, damb qui an tractat sus era consolidacion dera cartèra de servicis deth govèrn aranés en matèria sociau e era ampliacion der acòrd de traspassi
-
Damb era ampliacion efectiva deth traspàs en matèria sociau, en tot dar compliment ad aquerò qu’establís era Lei d’Aran, es Servicis Assistenciaus Integrats d’Aran poderan amiar a tèrme eth procès complèt de declaracions de discapacitat e dependéncia, amassa tanben damb es tramits de familha nombrosa, qu’actuauments non se pòden hèr ena Val d’Aran
Era sindica d’Aran, Maria Vergés, a recebut aguest maitin ath conselhèr de Drets Sociaus dera Generalitat de Catalunya, Carles Campuzano, damb qui a tractat diuèrsi ahèrs relacionadi damb era atencion sociau ena Val d’Aran que son primordiaus entath govèrn deth Conselh Generau d’Aran.
Ena amassada tecnica mantenguda dempús dera trobada privada dera Sindica damb eth conselhèr, an assistit tanben era conselhèra de Joenessa, Igualtat e Inclosion Sociau, Maria Menis, eth delegat deth Govèrn en Naut Pirinèu e Aran, Josep Castells, eth coordinador territoriau de Drets Sociaus en Naut Pirenèu e Aran, Josep Lluís Piqué, e es principaus responsables des Servicis Assistenciaus Integtats d’Aran.
“Consolidar es competéncies en matèria sociau ei ua des prioritats deth govèrn d’Aran tad aguesta legislatura que mos a de perméter ampliar era cartèra de servicis que ven dera man dera ampliacion der actuau acòrd de traspassi”, afirmaue era sindica d’Aran, que destacaue que: “damb aguesta ampliacion de traspassi artenheram, d’acòrd damb era normativa vigenta, poder amiar a tèrme eth procès complèt de declaracions de discapacitat e dependéncia, amassa tanben damb es tramits de família nombrosa, qu’en aguesti moments non se pòden hèr ena Val d’Aran, çò que significarà mens temps de demora tàs usatgèrs”.
En aguesta amassada, s’a podut tanben dar a conéisher ath conselhèr quina ei era forma de trabalh integrat qu’amien a tèrme es Servicis Assistenciaus Integrats d’Aran, qu’amassen er airau sanitari e eth sociau entà poder aufrir era melhor atencion possible as persones laguens deth sistèma.
“Pensi qu’a estat ua trobada fòrça profitosa tà andues parts, ena qu’auem tractat tanben diuèrses qüestions coma era atencion ara discapacitat e era possibilitat de trabalhar conjuntament en accions pionères qu’era pròpria Generalitat trabalhe en matèria d’integracion sociau”, afirmaue Vergés, qu’a volut: “arregraïr ath conselhèr Campuzano era sua predisposicion a trabalhar amassa entà desvolopar toti aqueri ahèrs relacionadi damb era atencion sociau en nòste territòri que tath nòste govèrn son de grana importància”.