Era Val d’Aran barre eth mes d’agost damb es melhors donades d’aucupacion des darrèri ans

 

  • Pendent aguest mes d’agost, era Val d’Aran a artenhut un 84,06% d’aucupacion, un increment deth 7% respècte a 2020, çò qu’a permetut qu’es donades agen aumentat tanben ena rèsta de servicis e negòcis toristics deth territòri

Era Val d’Aran comence eth mes de seteme dempús de barrar un ostiu istoric a nivèu toristic. Es donades d’aucupacion deth mes d’agost d’enguan an estat d’un 84,06%, ei a díder, un 7% mès qu’er agost der an passat (que s’arribèc ath 77’21%) e mès d’un 10% superior ath darrèr agost abans dera pandemia (en 2019 era aucupacion siguec d’un 73,87%). Eth trabalh amiat a tèrme per ensem deth sector toristic deth territòri e es accions de promocion enes qu’eth Conselh Generau a trabalhat pendent mesi, an prebotjat aguestes bones donades.

“Er ostiu, deth punt d’enguarda economic e toristic, a estat fòrça positiu entath sector toristic aranés”, a assegurat era sindica d’Aran, Maria Vergés, en tot manifestar que: “eth balanç ei peth dessús des darrèri ans e aquerò a ajudat a qu’eth sector se recupère” e  higie que ”tot e era situacion sanitària, aguest aument dera aucupacion non a suposat un increment dera incidéncia en Aran”.

“Pendent es darrèri mesi ençà, der airau de torisme deth Conselh Generau d’Aran, Foment Torisme Val d’Aran, auem amiat a tèrme fòrça accions de promocion e dinamizacion toristiques entà qu’eth nòste territòri poguesse afrontar dera melhor manèra possible aguesta tempsada d’ostiu, auem realizat accions damb mieis de comunicacion e influencers d’Espanha e França, campanhes en hilats sociaus, newsletters e accions conjuntes damb era Generalitat entà atrèir eth torisme familiar” afirmaue eth conselhèr d’Economia, Torisme e Promocion Economica, Juan Antonio Serrano.

Ath delà, deth Conselh Generau d’Aran ençà s’a apostat tanben per incentivar es principaus atractius deth nòste territòri a trauès de productes pròpris coma es activitats qu’aufrissen es centres d’educacion ambientau enes refugis dera Bassa d’Oles e Plan Batalhèr, es rotes guidades Cornèrs d’Aran, es mercats itinerants per diferents pòbles, ath delà dera amplia varietat d’activitats qu’aufrissen cada an es Musèus d’Aran e que meten en valor eth nòste auviatge istoric e culturau.

Donades d’aucupacion

Enguan, es donades d’aucupacion otelèra an estat fòrça superiors as der an passat autant en junhsèga coma en agost. En mes de junhsèga era aucupacion siguec deth 49,7% en Naut Aran (24,5% en 2020), deth 54,9% en Vielha e Mijaran (mentre que en 2020 siguec d’un 44,8%), e d’un 43,3% en Baish Aran (26,8% en 2020).

En çò que tanh ath mes d’agost, era aucupacion otelèra en Naut Aran enguan a estat deth 84,4% (er an passat 77,4%), un 84,4% en Vielha e Mijaran (a on en 2020 siguec deth 76,4%) e d’un 78,4% en Baish Aran (70,3% er an passat).

Era aucupacion otelèra dera Val d’Aran artenhèc es sòns maxims ena semana deth 16 ath 22 d’agost, quan s’arribèc a un totau deth 92,2%.

Per un aute costat, es campings an vist tanben incrementada era sua aucupacion respècte ar an anterior. En zòna d’acampada s’a arribat ath 30% en mes de junhsèga (12% en 2020) e ath 70% en agost (deuant deth 54% der an passat). Enes bungalows era aucupacion a estat deth 61% en junhsèga (37,5% er an passat) e deth 76% en agost (74% en agost de 2020).  Aguestes donades an auut tanben un impacte dirècte ena rèsta de servicis toristics deth territòri.

Afloéncia enes oficines de torisme

Aguest aument d’aucupacion s’a vist reflectit tanben ena afluéncia enes oficines de torisme. Mentre qu’en mes de junhsèga de 2020, s’atengueren a 7.353 persones enes oficines de Vielha e Mijaran e Naut Aran, enguan s’an atengut a 12.162. En mes d’agost der an passat, era afluéncia totau siguec de 18.624, mentre qu’en agost d’enguan a estat de 23.627 persones.

A despièch d’aguest aument, era afloéncia de visitaires francesi s’a vist redusida respècte a 2019, abans dera arribada dera pandemia, pr’amor des restriccions sanitàries e peth barrament deth pas deth Portilhon per part der Estat Francés. Enguan, s’an atengut a un totau de 694 clients d’origina francesa pendent eth mes de junhsèga e 803 pendent eth mes d’agost, mentre qu’en 2019 se n’atengueren 743 en junhsèga e 1076 en agost. Totun, i a auut un increment en aguest tipe de client respècte a 2020, (quan eth totau de clients francesi siguec de 507 en junhsèga e 654 en agost).

Accès ath miei naturau

“Pr’amor der aument de visitaires que dejà viuerem er ostiu passat e entà evitar aglomeracions, enguan auem implementat diuèrses mesures entà regular er accès as principaus airaus d’interès naturau ena Val d’Aran entà, per un costat, garantir era seguretat des usatgèrs e usatgères d’aguestes pistes e melhorar era sua experiéncia e, per ua auta, preservar aguesti endrets naturaus e evitar era sua massificacion”, explicaue era sindica d’Aran.

Aguestes mesures s’amien a tèrme a trauès de diuèrsi vigilants que s’an plaçat en accès ad aguesti paratges e que regulen eth pas segontes era ocupacion e places liures que i a enes parcatges, ath delà s’a abilitat era plataforma AparcAran entà facilitar informacion a temps reau e reservar parcatge ena Ribèra d’Aiguamòg, era Artiga de Lin e, a compdar deth 5 d’agost s’implementèc tanben ena Ribèra de Varradòs.

En totau, deth dia 15 de junhsèga enquiath 31 d’agost s’an registrat 55.531 accèssi ath miei naturau, des quaus 36.318 s’an produsit pendent eth mes d’agost.

A trauès d’AparcAran, en mes d’agost s’an reservat 4.693 places d’aparcament, 1.583 en Aiguamòg, 1.954 ena Artiga de Lin e 1.156 en Varradòs.

Aguesta regulacion se ve reflectida enes donades de visitaires a endrets coma era Artiga de Lin, qu’a vist incrementat eth nombre de clients en mes de junhsèga (un totau de 3.787 en 2021 deuant es 2.383 en 2020), mès qu’a patit un leugèr descens en mes d’agost, qu’a passat de 11.154 en 2020 a 10.466 en 2021. En cas de Colomèrs, es donades s’an mantengut fòrça similars as der an passat: 2.901 visitaires en junhsèga de 2021 deuant es 2.603 de 2020; mentre qu’en mes d’agost de 2021 an estat 10.614 e 10.606 en agost de 2020. Damb aguesta regulacion s’a podut esvitar era massificacion d’aguesti endrets tant toristics, e s’an podut promocionar tanben d’auti paratges naturaus mens coneishuts dera Val d’Aran coma alternativa.

Comments are closed.