Eth hestivau ei organizat pera Associacion Espanhòla de Fotògrafs de Natura (AEFONA)
Er eveniment dispausarà de multiples actiuetats restacades damb era fotografia: exposicions, presentacions e gessudes guidades
Er objectiu deth hestivau ei que se convertisque en un referent entàs amants dera fotografia e dera natura
Era Val d’Aran celèbre era 1a edicion deth Hestivau Internacionau de Fotografia de Natura dera Val d’Aran, qu’aurà lòc deth 20 ath 22 de junh. Eth hestivau ei organizat pera Associacion Espanhòla de Fotògrafs de Natura (AEFONA), e compde damb eth patrocini deth Conselh Generau d’Aran, er Ajuntament de Vielha e Mijaran e Foment Torisme Val d’Aran.
Er objectiu principau deth hestivau ei que se convertisque en un referent entàs amants dera fotografia, autant professionaus coma amateurs. Er eveniment se celebrarà en dues localizacions concrètes: Era Audiovisuau de Vielha, a on auràn lòc es ponéncies e projeccions. Er espaci compde damb un afora limitat en 120 places, de sòrta qu’es interessadi en assistir an de reservar era sua plaça, en tot enviar un corrèu electronic ara adreça: activitats@aefona.org.
D’auta banda era Glèisa Sant Joan d’Arties, a on aurà lòc era exposicion “Nuestras Costas”, realizada per diuèrsi membres dera associacion FONAMAD.
Pendent eth hestivau, es participaires poderàn assistir as presentacions e exposicions audiovisuaus de diuèrsi fotògrafs considerables ath torn dera fotografia de natura, coma: Javi Montes, Joris Van Alphen, Antonio Liébana, Oriol Alamany, Iñaki Relanzón, Pablo Bou, Alfonso Lario e eth naturalista e exdirector de diuèrsi parcs naturaus en Africa, Luis Arranz.
Ath delà, es assistents auràn era possibilitat de realizar gessudes, organizades pera agéncia de viatges Wildwatching, as localizacions seleccionades peth geniau fotògraf aranés Javi Montes. Se poderàn realizar fotografies de bèls païsatges: pleï de montanhes que dividissen er encastre, es flors ‘ac colorejen e era fauna que i trapam.
“Aguest hestivau supause ua grana oportunitat entara Val d’Aran de dar a conéisher eth territòri d’ua manèra especiau, coma ei era fotografia. Credem qu’era participacion de totes es entitats que participen ena organizacion der eveniment darà coma resultat un hestivau que demorem que sigue un referent entàs pròplèus ans, en tot júnher era fotografia e era natura”, comente era conselhèra de Torisme, Comèrç e Consum deth Conselh Generau d’Aran, Anna Díaz.