• Vielha celèbre er acte inaugurau damb era assisténcia des equipes de toti es païsi participaires.
• Deth 7 ath 14 de març era estacion d’esquí aranesa, Baqueira Beret, amassarà a 220 jornalistes de mès de 32 païsi.
• Se tracte d’un eveniment internacionau de grana magnitud que brinde era oportunitat de hèr conéisher era cultura e eth patrimòni dera Val d’Aran.
• Eth SCIJ compde damb mès de 2.000 sòcis jornalistes de 46 païsi.
Ager, dia 8 de març, auec lòc en Vielha er acte inaugurau dera 62au Trobada Internacionau de Jornalistes deth SCIJ (Ski Club International des Journalistes) que debanarà aguesta setmana, deth 7 ath 14 de març, e a on 220 jornalistes de mès de 32 païsi e de totes es disciplines (espòrt, cultura, economia, societat, politica, eca.) se dan cita ana Val d’Aran.
Aguest eveniment, que se celèbre des deth 1955, s’organize cada an en un país diferent e enguan, per tresau còp ena istòria, debane ena estacion aranesa de Baqueira Beret, en tot coïncidir damb eth 50 anniversari dera estacion.
Es participaires poderàn gaudir pendent aguesta setmana d’ues excellentes condicions entara practica der esquí, es servicis d’ua des melhors estacions deth mon coma ei Baqueira Beret e tanben, organizades per Foment de Torisme Val d’Aran, de visites guidades entà hèr ua aproximacion ath romanic dera val, era cultura aranesa, es tradicions e per descompdat era gastronomia e eth comèrç dera Val d’Aran.
Eth SCIJ compde damb mès de 2.000 jornalistes de 46 païsi e des deth 1955 era Amassada jamès a mancat ne un còp.
Era inauguracion compdèc damb era preséncia dera conselhèra de Torisme, Comèrç e Consum d’Aran, Anna Díaz, eth baile de Vielha e Mijaran, Álex Moga, eth sosdirector comerciau de Baqueira Beret, Xavi Ubeira, eth president deth SCIJ Internacionau, Frederick Wallace e eth president deth SCIJ Espanha, Goyo Prados.
Es organizadors d’aguest important eveniment internacionau son Baqueira Beret, er Ajuntament de Naut Aran e eth Conselh Generau d’Aran. Tanben an collaborat er Ajuntament de Vielha e Mijaran, era Agéncia Catalana de Torisme, eth Patronat dera Deputacion de Lhèida e Torisme de Barcelona.
Mès informacion: