Era Val d’Aran entrarà ena Fasa 1 de desescalada eth pròplèu 11 de mai

  • Eth Sindic d’Aran acordèc aguesta setmana damb era Consellera de Salut dera Generalitat aguest auanç, pr’amor qu’es donades de contagi e recuperacion deth territòri son favorables, mès cau rebrembar qu’ei de besonh préner totes es mesures de proteccion establides entà evitar un nau rebròt de COVID-19 en Aran 

Atau coma acordèc hè pògui dies eth Sindic d’Aran, Francés Boya, damb era Consellera de Salut dera Generalitat, Alba Vergés, a compdar deth pròplèu deluns, 11 de mai, era Val d’Aran entrarà ena Fasa 1 de desescalada dera crisi deth COVID-19 segontes an confirmat aguesta madeisha tarde eth Ministre de Sanitat, Salvador Illa, e eth director deth Centre d’Alertes e Emergéncies Sanitàries, Fernando Simón.

“Es nòstes donades de contagi e de recuperacion mos permeten dar aguest pas”, afirme eth sindic d’Aran, en tot híger que: “non se tracte de voler anar de prèssa, pr’amor que mos cau préner totes es mesures de proteccion establides, mès en aguest equilibri entre era proteccion e era activacion progressiva dera economia, mos cau anar auançant de forma prudenta”.

Era entrada en aguesta naua fasa de desescalada ei ua passa mès entà recuperar era normalitat. Aguestes son es mesures mès destacables dera naua fasa:

  • S’autorizen es amassades sociaus d’enquia 10 persones.
  • Se permeterà er us compartit des veïculs privats limitat a un conductor e un ocupant qu’aurà d’anar ena part de darrèr.
  • S’autorizen es velatòris damb un limit maxim de 15 persones en espacis dubèrts e 10 en espacis barrats.
  • Se daurissen es lòcs de culte damb un limit d’un tèrç d’aucupacion.
  • Dubertura d’establiments e locaus minoristes sense cita prèvia damb un limit d’un 30% dera sua capacitat.
  • Se poiràn daurir es terrasses des establiments d’ostalaria e restauracion damb ua limitacion deth 50%.

A despièch d’aguest auançament entara naua normalitat, cau rebrembar qu’entà evitar un nau rebròt de contagis de COVID-19 en territòri ei de besonh respectar es normes establides pes autoritats competentes.

Comments are closed.