Foment Torisme Val d’Aran participèc en eveniment coma sòci dera mèrca Pirenèus.

Un totau de 8 empreses promoigueren era sua aufèrta de senderisme e torisme actiu.

Participèren 20 Tours operadors e agéncies de viatges d’Euròpa e Israèl

Era Val d’Aran participèc en Workshop Pirenèus que debanèc eth 10 de junh ena poblacion de Cellers, ena comarca deth Pallars Jussà de Lleida. En aguest eveniment, i auec mès de 50 empreses des Pirenèus, era Val d’Aran participèc damb era preséncia de 8 empreses (Camins, Naut Viatges, Kabi Travel, Copos Events, Casa Lola, Otèl Himalaia, Otèl Seixes e Ostau d’Òc), ath delà deth Patronat de Torisme, Foment Torisme Val d’Aran, coma sòci dera mèrca Pirenèus.

Er eveniment organizat pera Agéncia Catalana de Torisme servic entà promòir era aufèrta de senderisme e torisme actiu deuant 20 Tours operadors e agéncies de viatges provenenti d’Euròpa (Alemanha, Belgica e Olanda) e d’Israèl.

“Ei fòrça important entara Val d’Aran poder hèr conéisher era nòsta vasta aufèrta de torisme actiu en eveniments coma eth Workshop Pirenèus, pr’amor que se coneishen es diferentes empreses implicades en aguest sector, que trabalhen entà melhorar era qualitat dera nòsta destinacion toristica”, comente era conselhèra de Torisme, Comèrç e Consum, Anna Diaz.