Era Val d’Aran sedença der Open d’Espanha de BTT Maraton

Era Val d’Aran acuelherà eth 3 d’agost er Open d’Espanha de BTT Maraton tanben puntuable entath Campionat de Catalunya de BTT – Maraton, organizat peth Club Ciclista Val d’Aran, damb eth nòm de NAUT ARAN 2000 coma ua competicion de BTT longa distància.

NAUT ARAN 2000

Era pròva, se desvoloparà sus ua distància de 111,3 Km e 3420 mètres de desnivèu positiu pes municipis de Naut Aran, Vilamòs e Vielha, era gessuda serà plaçada en Arties, e era arribada en Salardú.
Es categories Elèit, Sub 23 e Mastèr 30, completaràn es 111,3 Km de carrèra e es categories de Fèmines Elèit e es categories Mastèr 40, 50 e 60 haràn 66,53 Km.

Eth campionat se completarà damb ua marcha ciclo toristica dubèrta as majors de 16 ans que preneràn era gessuda 5 menutes dempús d’aué’c hèt era competicion e damb un recorregut limitat a 30,6 Km o 66.53 Km.

En paraules dera conselhèra de Torisme, Comèrç e Consum, Anna Diaz, “ei ua grana satisfaccion entara Val d’Aran poder acuélher er Open d’Espanha de BTT Maraton, pròva puntuable entath Campionat de Catalunya. Ath delà, açò supausarà era promocion de bona part deth territòri aranés.”

“Aguestes pròves esportiues placen ara Val d’Aran coma ua destinacion toristica e esportiua de qualitat, era quau causa mos place en un lòc priviliegiat en Estat Espanhòu” a soslinhat eth conselhèr d’Espòrts d’Aran, Luís Carlos Medina.

Comments are closed.