Era Val d’Aran sedença dera tresau edicion dera Campilaro

Vielha, 19 de junhsèga de 2017.- Era Val d’Aran serà sedença d’etapa dera tresau edicion dera Campilaro, que se celebrarà deth 23 ath 25 junhsèga de 2017.

campilaro
Campilaro 2017, rota ciclista que trauèsse eth còr des Pirenèus, prepause un traçat totau de 330 quilomètres e 8.300 mètres desnivèu positiu. Campilaro 2017 compdarà de quate etapes de mieja e nauta montanha damb tres ciutats de gessuda d’etapa: Saint-Lary Soulan, Luchon e Vielha (Val d’Aran).

Era rota convide a recórrer legendàries carretères que vederen a passar eth Tour de França e era Vuelta a Espanha e a descorbir es lòcs e païsatges excepcionaus qu’amaguen es Pirenèus. Aguesta edicion aufrís un nau format mès dubèrt, mès accessible a nivèu esportiu e mès economic, damb er objectiu de conciliar era passion peth ciclisme e eth torisme de vacances.

Es Pirenèus seràn protagonistes dera rota, damb escalades de nauta montanha coma eth Pòrt de Balès (1755 m), eth Hospice-de-France (1385 m), Superbagnères (1800 m), eth Portilhon (1296 m), eth Pòrt dera Bonaigua (2072 m), eth Peyresourde (1569 m) e eth de Azet (1580 m). Eth recorregut dera Campilaro 2017 ei ua circular damb inici e fin a Saint-Lary Soulan.

Eth deluns 24 de junhsèga era Campilaro 2017 arribarà ara Val d’Aran procedent de Luchon a on recorrerà 79,5 km. Entrarà es tèrres araneses peth Còth deth Portilhon des d’a on baisharà enquia Bossòst. D’aquiu crotzarà era estacion de Baqueira-Beret entà dirigir-se ath Pòrt dera Bonaigua entà acabar damb eth descens enquia Vielha. Dimars 25 es participaires gesseràn deth cap-lòc aranés e abandonaràn era Val d’Aran damb destinacion a Saint-Lary Soulan.

profil_-_campilaro_2017_-_etape_3_png_2_ profil_-_campilaro_2017_-_etape_4_png_3_ artoff17487

Comments are closed.