• Eth Conselh Generau d’Aran, a trauès de Musèus dera Val d’Aran, a organizat er acte “Croniques Poetiques” entath deluns, 21 de març entàs 19:00 ores ena Bibliotèca Generau de Vielha, un recitau fòrça especiau e que compdarà damb era participacion d’ua trentia de persones volontàries entà commemorar eth Dia Internacionau dera Poesia

Eth Conselh Generau d’Aran, a trauès der hilat de Musèus dera Val d’Aran, organize er acte Croniques Poetiques entà commemorar eth Dia Internacionau dera Poesia.

Aguest recitau se premanic pendent es prumèri mesi de 2020 d’acòrd damb era tematica deth Musèu en aqueth an: er An des Croniques. Mès, pr’amor dera pandèmia e eth confinament non se podèc amiar a tèrme e, en 2021, es mesures establides pes autoritats competentes tanpòc permetien era sua realizacion presenciau.

Fin finau, enguan, era situacion sanitària e era normativa vigenta possibiliten era realizacion presenciau d’actes culturaus, e era Val d’Aran tornarà a gaudir dera serada dedicada ara poesia mès especiau der an!

Totun, i an cambis importants ena realizacion d’aguest recitau: er scenari principau non serà eth Musèu dera Val d’Aran coma enquiara, senon que serà era Bibliotèca Generau de Vielha, qu’aufrís un espaci mès ampli, sense auer de renonciar ar usatge culturau der equipament.

D’acòrd damb aguesta tematica tant periodistica, eth recitau pòrte per nòm “Croniques poetiques”. Er acte s’estructurarà, per tant, damb es madeishes seccions qu’un diari: Internacionau, Locau, Succèssi, o eth Temps, entre d’auti, e es poèmes qu’intègren cada seccion an relacion damb aguesti apartats.

Aguest eveniment, organizat peth Musèu dera Val d’Aran des de 2013, ei ua des activitats mès consolidades a on participe mès activament eth public locau. Collabòren, ena seleccion de poèmes, es bibliotèques de Vielha e Naut Aran, er Airau de Lengua deth Conselh Generau d’Aran e er Archiu Generau d’Aran.

Eth recitau compde damb ua trentia de persones volontàries que recitaran es poèmes, bères ues acompanhades de musica, d’autes damb teatre… era diversion ei assegurada e es suspreses tanben.

Es assistents poiràn compartir era experiéncia enes hilats damb era etiqueta #CroniquesPoetiques