• Era campanha, includida laguens deth Plan de Sostenibilitat Toristica dera Val d’Aran, se refortís enguan damb era installacion de 54 senhaus informatius en lòcs estrategics.

#CaminsCompartits ei ua iniciativa que ja hè ans que se dedique a milhorar era convivéncia e era seguretat enes camins deth territòri. Era campanha neishèc coma responsa ar aument de persones que gaudissen deth mèdi naturau e ara diversitat d’usatges que coïncidissen enes camins: senderistes, ciclistes, corredors, familhes, visitants e professionaus der entorn.

Eth messatge centrau ei eth madeish: es camins son espacis compartidi e requerissen actituds responsables. Redusir era velocitat en crotzar-se damb pedanhs, cedir eth pas per orde de prioritat o plaçar tostemp era seguretat coma element principau son gèsti que faciliten era convivéncia e milhoren era experiéncia de totes es persones.

Coma principau nauetat, s’an installat 14 senhaus de gran format en zònes de nauta afluéncia —entrades e gessudes de pòbles, horcalhs e punts de confluéncia— e 40 senhaus de petit format distribuïdi en sendèrs segondaris. Er objectiu ei refortir eth messatge aquiu a on era interaccion entre diferenti usatgèrs ei mès abituau.

Es messatges de #CaminsCompartits s’an concebut en un format visuau, clar e multilingüe, damb era volontat d’arribar tant ara populacion locau com tàs persones que visiten era Val d’Aran. Era iniciativa s’alinhe damb eth compromís deth territòri, reconeishut coma Resèrva dera Biosfèra, d’avançar entà un modèl toristic mès sostenible e respectuós damb era vida locau e eth mèdi naturau.

“Petiti gèsti pòden marcar ua grana diferéncia. Era convivéncia enes camins ei responsabilitat de toti”, an afirmat hònts deth Conselh Generau d’Aran.

Damb aguesta campanha de #CaminsCompartits, includida laguens des accions previstes en Plan de Sostenibilitat Toristica, era Val d’Aran refortís eth sòn projècte per un usatge responsable deth territòri e per ua convivéncia positiva entre espòrt, léser, natura, populacion locau e visitants.

Vielha, 12 de junh de 2026