• Mès de 300 professionaus internacionaus descorbissen eth potenciau deth territòri.

• Eth congrès AdventureELEVATE Europe a projectat es Pirenèus e Catalonha coma destinacion internacionau de torisme actiu e de natura.

Era Val d’Aran a acuelhut entre dimèrcles e diuendres eth congrès internacionau AdventureELEVATE Europe, damb era participacion de mès de 300 operadors toristics e periodistes especializadi provenents de lèu 50 païsi. Entre es representants i a agut professionaus des Estats Units, Reiaume Unit, Irlanda, Suècia, Àustria, Itàlia e Finlàndia, entre d’auti païsi.

Eth conselhèr de Torisme deth Conselh Generau d’Aran, Josep Canut, a remercat “era importància de recéber ad aguesti professionaus en territòri entà que poguen conéisher de prumèra man es sues potencialitats”. Segontes Canut: “aguest tipe d’iniciatives an estat clau entà desestacionalizar eth torisme e entà hèr a conéisher era Val d’Aran e es Pirenèus en encastre internacionau”.

Es participants an visitat ath long dera setmana diuèrses comarques dera demarcacion de Lhèida e an acabat era experiéncia ena Val d’Aran, a on an podut descorbir eth sòn patrimòni, era cultura e er entorn naturau. Eth conselhèr a remarcat qu’aquerò viscut ath long d’aguesti dies se convertirà en ua fòrta promocion internacionau deth territòri.

Ua oportunitat estrategica entath sector toristic e era projeccion des Pirenèus

Eth congrès a representat ua oportunitat estrategica entà refortir era projeccion internacionau deth territòri, generar naues oportunitats de negòci entàs enterpreses locaus e consolidar Catalonha e es Pirenèus coma destinacion de referéncia en torisme actiu e de natura.

Era trobada a compdat tanben damb ua importanta preséncia d’enterpreses catalanes ligades ath torisme actiu, de natura e de montanha, convidades pera Agéncia Catalana de Torisme entà presentar e comercializar era sua aufèrta deuant des principaus operadors e prescriptors especializadi.

Er eveniment a estat impulsat pera Adventure Travel Trade Association (ATTA), era organizacion de referéncia mondiau en torisme d’aventura e natura, qu’amasse mès de 30.000 professionaus aderidi.

Peth sòn costat, eth vicepresident deth Patronat de Torisme dera Deputacion de Lhèida, Juan Antonio Serrano, a definit aguest congrès coma era trobada professionau toristica mès importanta celebrada enquiath moment enes Pirenèus. Serrano a soslinhat qu’aguest eveniment a de contribuir a captar clientèla internacionau e a mostrar ath mon era qualitat dera aufèrta toristica, eth compromís damb era sostenibilitat e era capacitat deth territòri de generar experiéncies uniques.

Era directora dera Agéncia Catalana de Torisme, Arantxa Calvera, a explicat qu’ua grana part des operadors e dera premsa especializada encara assòcien Catalonha damb eth solei, era plaja e Barcelona, e desconeishen era riquesa naturau e culturau des Pirenèus. Segontes Calvera, AdventureELEVATE Europe a servit entà plaçar Catalonha e es Pirenèus deuant des principaus operadors e prescriptors internacionaus especializadi.

Vielha, 23 de mai de 2026