Pendent era tarde d’ager, dimars 23 de junhsèga, eth parc de Pompièrs de Vielha acuelhec era session fotografica dera 9au edicion deth calendari solidari “Bombers amb Causa”.

En aguest projècte solidari participen, des der an 2011, pompièrs de diuèrsi endrets de Catalonha e enguan, per prumèr viatge, tanben d’Aran.

Era recaptacion artenhuda damb aguesti calendaris de 2020 se destinarà a finançar era bèca de recèrca “Bombers amb Causa”, que concedís er Espitau Sant Joan de Déu entara investigacion de malauties infantils e, tanben, a projèctes d’atencion a mainatges e mainades en risc d’exclusion, atengudi en auti centres de Sant Joan de Déu.

Es protagonistes des fotografies en parc de Pompièrs de Vielha sigueren Llibert, Lucía e Aritz, ath delà des pròpis pompièrs e eth sòn camion espitau de campanha.

Entà guanhar-se era complicitat dera mainadèra, es pompièrs les ensenhèren toti es cornèrs deth parc, les deishèren provar-se era sua ròba de trabalh e les pujèren a diferents veïculs. Coma resultat, enes imatges se plasmèc era complicitat des petits damb eth còs de pompièrs d’ua forma fòrça divertida.

Eth fotògraf dera session, que participèc en aguest projècte de forma totauments desinteressada, siguec Gorka Martínez, fòtoperiodista que collabòre abituauments damb diuèrsi mejans locaus.

Damb eth calendari de 2019 se recaptèren 74.000 euròs, era chifra mès nauta en toti es ans deth projècte. Aguesti sòs, amassa damb es requectadi ena Vertical de Montserrat e era Corsa de Cercs, se destinèren ara bèca de recèrca der Espitau Sant Joan de Déu d’Espluges deth Dr. Ángel Montero, era fondacion Bayt al-Thagafa e a d’auti tres projèctes de Sant Joan de Déu Tèrres de Lhèida.

Hònt: Obra Social Sant Joan de Déu