Es freeriders deth Programa de Pre tecnificacion deth Centre Especializat ena Tecnificacion Esportiua d’Espòrts d’Iuèrn dera Val d’Aran (CETEI), e membres deth Club d’Esquí Emotion, Abel Moga, Axel Joaniquet e Pòl Tellosa, ath delà de Jordi Riba (ex tecnificacion) e Julian Puras (futur tecnificacion), participants en Freeride Junior Tour d’aguesta sason an obtengut arribar a posicions privilegiades jos era direccion der entrenador Cristian Boiria.
Er aranés, Abel Moga Carracedo, damb 16 ans, a dat pòca opcion a toti donques, a part de guanhar era generau deth circuit espanhòu d’enguan e èster 3au pendent tot er an en FJT, ara fin a artenhut era 4au posicion finau, un saut important des deth 44au lòc dera passada sason e eth melhor resultat dera istòria deth freeride nacionau en esquí.
Era progression d’Axel Joaniquet damb 17 ans a estat tanben espectaculara, donques deth 100au lòc en classament der an passat, aguesta sason a artenhut era 9au posicion finau, en tot demorar-li ua sason mès entà sajar d’arribar ath mès naut deth pòdium en 2018.
Er aranés, Pòl Tellosa Badía, damb 16 ans e en tot èster eth sòn dusau an coma corredor seguís creishent e enguan a artenhut ua 12au posicion finau, en tot melhorar era sua 23au posicion d’est an passat. Ei un saut de qualitat e eth pròplèu an serà fòrça important entà afermar-se enes dètz prumèrs lòcs.
Julian Puras, damb 14 ans e en tot èster eth sòn prumèr an participant a artenhut quauquarren incresible, hèr tres carrères e dar tres grani resultats, açò ac a portat ath lòc 26au deth classament.
Pera sua part, en sòn darrèr an coma Júnior, Jordi Riba, de 18 ans, a artenhut eth sòn melhor resultat aguesta sason ena finau deth FJT de Verbier eth passat 1 d’abriu, en tot demorar en 10au lòc de 57 freeriders d’onze païsi. Jordi passe ara categoria d’adults e correrà es Qualifiers eth pròplèu an.
En paraules der entrenador Cristian Boiria: “Barram ua sason incredible”.
Eth Centre de Tecnificacion Esportiua d’Espòrts d’Iuèrn dera Vau d’Aran (CETEI), restacat ara Reiau Federacion Espanhòla d’Espòrts d’Iuèrn (RFEDI) e ara Federacion Catalana d’Espòrts d’Iuèrn (FCEH), a per objectiu ajudar ara progression de joenes promeses e velhar pera sua formacion integrau. Eth Conselh Superior d’Espòrts dèc eth vist e platz ara creacion deth Centre Especializat ena Tecnificacion Esportiua d’Espòrts d’Iuèrn dera Val d’Aran, prebotjat peth Conselh Generau d’Aran que se cargue de gerí’c.
Vielha, 7 d’abriu de 2017
Conselh Generau d’Aran: Núria Sanjuan
Hònt e foto: Club Esquí Emotion