Vielha, 29 d’abriu de 2016.- Eth Centre de Formacion d’Adults Val d’Aran aufrís ara poblacion adulta un gran ventalh de corsi entà ampliar coneishences e enriquir era formacion globau, que permet as alumnes adaptar-se as demandes dera societat e accedir a d’auti nivèus d’estudis o en mon laborau.

Aguest cors 2015-2016, eth Centre de Formacion d’Adults aufrís ensenhaments iniciaus e basics e competéncies entara societat dera informacion (Inglés, Francés e Informatica basica e nivèu d’usatgèr); formacion basica (Graduat en Educacion Segondària Obligatòria-GES), atau coma era preparacion entàs pròves d’accès a Cicles formatius de Grad Superior. En çò que tanh as lengües, aguest cors i a tres nivèus d’anglés e francés, deth temps que s’aufrissen quate d’informatica. Era intencion dera responsabla deth Centre d’Adults Val d’Aran, Montse García, ei de cara ath pròplèu cors, començar corsi monografics intensius dirigidi a monitors d’esquí e d’ETEVA, e a professionaus deth sector dera ostalaria enfocada ara atencion ath client en otèls e restaurants.

Quauques des activitats que mès acceptacion an agut enguan an estat eth Cinefòrum en anglés e francés, e es practiques de convèrsa dirigida a professionaus deth comèrç, impulsada pera associacion d’alumnes deth centre.

Eth Centre de Formacion d’Adults Val d’Aran, tanben s’aucupe de hèr er acompanhament a trauès der IOC entà toti aqueri alumnes que non an obtengut era ESO, en tot actuar coma punt de supòrt. En çò que tanh ara preparacion des pròves d’accès a estudis universitaris, encara que non i a cap tipe de requisit prealable, eth centre realize ua pròva de nivèu entà saber en quin punt se tròben es alumnes.

Convèni de collaboracion entre eth Departament d’Ensenyament dera Generalitat de Catalonha, Ajuntament de Vielha e Mijaran e Conselh Generau d’Aran, en matèria de Servicis Educatius e eth Centre de Formacion d’Adults Val d’Aran

Eth Departament d’Ensenyament dera Generalitat de Catalonha, coma titulara deth Servici Educatiu e deth Centre de Formacion d’Adults dera Val d’Aran a signat un convèni de collaboracion damb eth Conselh Generau d’Aran e er Ajuntament de Vielha, en çò que tanh as despenses d’emplec, mantenença e conservacion dera bastissa deth Centre de Formacion d’Adults Val d’Aran, a trauès deth, eth Departament d’Ensenyament aportarà 5.000€, entara despensa d’alarma, neteja e telefòn; eth Conselh Generau d’Aran, aportarà 5.000€, entàs despenses generades pera mantenença dera bastissa; e er Ajuntament de Vielha e Mijaran, assumirà es despenses de neteja dera bastissa, atau coma deth subministrament de lum e de cauhatge.